January 05, 2021
January 05, 2021
ദോഹ: ഖത്തറിനു മേലുള്ള ഉപരോധം സൗദി അറേബ്യ അവസാനിപ്പിച്ചു. ഖത്തറുമായുള്ള എല്ലാ അതിര്ത്തികളും സൗദി അറേബ്യ തിങ്കളാഴ്ച രാത്രി മുതല് തുറക്കും. ഖത്തറുമായുള്ള സൗദിയുടെ കര-ജല-വ്യോമാതിര്ത്തികള് തുറക്കുന്ന കാര്യത്തില് ധാരണയായെന്ന് ഖത്തറിലുള്ള കുവൈത്ത് വിദേശകാര്യമന്ത്രി ശൈഖ് ഡോ. അഹമ്മദ് നാസര് അല് മുഹമ്മദ് അല് സാബാഹ് പറഞ്ഞു.
'അല്-ഉല ഉച്ചകോടിയുടെ പ്രസ്താവനയില് ഒപ്പു വയ്ക്കുന്നതുമായി ബന്ധപ്പെട്ട് കുവൈത്ത് അമീര് ഖത്തര് അമീറുമായും സൗദി കിരീടാവകാശിയുമായും ഫോണില് സംസാരിച്ചു. ഖത്തറിനും സൗദി അറേബ്യയ്ക്കും ഇടയിലെ കര-ജല-വ്യോമപാതകള് തുറക്കാന് ധാരണയായിട്ടുണ്ട്. ഇന്ന് രാത്രി മുതല് അതിര്ത്തികള് തുറക്കപ്പെടും.' -കുവൈത്ത് വിദേശകാര്യ മന്ത്രി പറഞ്ഞു.
ധാരണ സംബന്ധിച്ച വിശദവിവരങ്ങള് അദ്ദേഹം വെളിപ്പെടുത്തിയില്ല. ഖത്തര്-സൗദി അതിര്ത്തികള് തുറക്കാനുള്ള തീരുമാനം സ്വാഗതം ചെയ്യുന്നതായി ജി.സി.സി സെക്രട്ടറി ജനറല് ഡോ. നയെഫ് ഫാലാഹ് മുബാറക്ക് അല് ഹജ്റാഫ് പറഞ്ഞു.
ഖത്തറിനു മേലുള്ള മൂന്നു വര്ഷത്തിലധികം നീണ്ട ഉപരോധമാണ് സൗദി അറേബ്യ ഇപ്പോള് പിന്വലിച്ചിരിക്കുന്നത്. നാളെ സൗദിയില് നടക്കുന്ന 41-ാമത് ജി.സി.സി ഉച്ചകോടിയില് ഗള്ഫ് പ്രതിസന്ധി പരിഹരിക്കുന്നതിനുള്ള കരാര് ഉണ്ടാകുമെന്നാണ് പ്രതീക്ഷിക്കുന്നത്. ഇതിനു മുന്നോടിയായാണ് സൗദി-ഖത്തര് അതിര്ത്തികള് തുറക്കാന് ധാരണയായത്.
നേരത്തേ ഖത്തറിനായി തങ്ങളുടെ വ്യോമപാത തുറക്കാനും ഖത്തറിനും ഈജിപ്തിനുമിടയിൽ വിമാനസർവീസുകൾ പുനരാരംഭിക്കാനും ഈജിപ്ഷ്യൻ പ്രസിഡന്റ് അബ്ദുൽ ഫത്തേഹ് അൽ സിസി സന്നദ്ധത അറിയിച്ചതായി അൽ-അറബി അൽ-ജദീദ് ന്യൂസ് റിപ്പോർട്ട് ചെയ്തിരുന്നു. കഴിഞ്ഞ കുറച്ചു നാളുകളായി ഈജിപ്തിന്റെ നിലപാടിൽ ഗണ്യമായ മാറ്റമുണ്ടായതായും അബുദാബിക്ക് പകരം റിയാദുമായി കൂടുതൽ അടുക്കാനാണ് ഈജിപ്ത് നിലവിൽ ശ്രമിക്കുന്നതെന്നും ചില ഉന്നത വൃത്തങ്ങൾ വെളിപ്പെടുത്തിയതായാണ് റിപ്പോർട്ടിൽ പറയുന്നത്.ജനുവരി 5 ന് സൗദിയിലെ അൽ-ഉലയിൽ നടക്കാനിരിക്കുന്ന 41 മത് ജി.സി.സി ഉച്ചകോടിയിൽ പങ്കെടുക്കാൻ ഈജിപ്ത് പ്രസിഡന്റ് സൗദി അറേബ്യയിലേക്ക് പോകുമെന്ന് റിപ്പോർട്ടുകൾ പുറത്തുവന്നതിന് തൊട്ടുപിന്നാലെയാണ് ഈ പരാമർശം.
ന്യൂസ് റൂം വാർത്തകൾ ഫേസ്ബുക്കിൽ ലഭിക്കാനായി ഇവിടെ ക്ലിക്ക് ചെയ്ത് പേജ് ലൈക്ക് ചെയ്യൂ.
ന്യൂസ് റൂം വാര്ത്തകള് ടെലിഗ്രാമില് മുടങ്ങാതെ ലഭിക്കാനായി ഇവിടെ ക്ലിക്ക് ചെയ്യൂ.
ന്യൂസ് റൂം വാര്ത്തകള് വാട്ട്സ്ആപ്പില് മുടങ്ങാതെ ലഭിക്കാനായി ഇവിടെ ക്ലിക്ക് ചെയ്ത് മെസേജ് അയക്കൂ.