February 15, 2022
February 15, 2022
കുവൈത്ത് സിറ്റി : രാജ്യത്തിന്റെ കോവിഡ് മാനദണ്ഡങ്ങളിൽ മാറ്റങ്ങൾ വരുത്താൻ തീരുമാനിച്ചതായി കുവൈത്ത് മന്ത്രിസഭ അറിയിച്ചു. പ്രതിവാര ക്യാബിനറ്റ് യോഗത്തിലെ കോവിഡ് അവലോകനത്തിന് ശേഷമാണ് വിദേശയാത്രികർക്ക് ഇളവുകൾ നൽകാൻ തീരുമാനിച്ചത്. ഇനിമുതൽ, രണ്ട് ഡോസ് വാക്സിനും സ്വീകരിച്ച വ്യക്തികൾക്ക് യാത്രക്ക് മുൻപോ കുവൈത്തിൽ എത്തിയതിന് ശേഷമോ പീ.സീ. ആർ പരിശോധന നടത്തേണ്ടതില്ല. ഇവർക്ക് നിർബന്ധിത കൊറന്റൈനും ആവശ്യമില്ല. ഫെബ്രുവരി 20 മുതലാണ് ഈ ഇളവുകൾ പ്രാബല്യത്തിൽ വരിക.
കുവൈത്ത് സർക്കാറിന്റെ ഔദ്യോഗിക വക്താവും ഗവണ്മെന്റ് കമ്യൂണിക്കേഷൻ സെന്റർ മേധാവിയുമായ താരിഖ് അൽ മസ്റമാണ് വാർത്താ സമ്മേളനത്തിലൂടെ ഇളവുകൾ പ്രഖ്യാപിച്ചത്. അതേസമയം, വാക്സിനേഷൻ പ്രക്രിയ പൂർത്തിയാക്കാത്തവർ യാത്ര പുറപ്പെടുന്നതിന്റെ 72 മണിക്കൂറെങ്കിലും മുൻപുള്ള പീ.സീ. ആർ പരിശോധനാ ഫലം ഹാജരാക്കണം. ഇവർക്ക് ഏഴ് ദിവസത്തെ നിർബന്ധിത കൊറന്റൈൻ എന്ന വ്യവസ്ഥയിലും മാറ്റമില്ല. കൊറന്റൈൻ കാലയളവിന് ശേഷം, കോവിഡ് പരിശോധനയിൽ നെഗറ്റീവ് ആണെന്ന് തെളിഞ്ഞാലേ ഇവർക്ക് പുറത്തിറങ്ങാൻ കഴിയൂ. കുവൈത്ത് ആരോഗ്യമന്ത്രാലയം അംഗീകരിച്ച വാക്സിനുകൾ സ്വീകരിച്ചവർക്ക് മാത്രമേ ഇളവുകൾ ലഭിക്കൂ എന്നും താരിഖ് കൂട്ടിച്ചേർത്തു.