August 27, 2021
August 27, 2021
അഫ്ഗാനിലെ കാബൂൾ അന്താരാഷ്ട്രവിമാനത്താവളത്തിൽ ഐസിസ് നടത്തിയ ചാവേറാക്രമണത്തിൽ അറബ് രാഷ്ട്രങ്ങൾ അനുശോചനം അറിയിച്ചു. രണ്ട് ചാവേറുകളടക്കം മൂന്ന് പേർ നടത്തിയ ആക്രമണത്തിൽ നിരവധി അഫ്ഗാൻ പൗരന്മാരും പത്തോളം അമേരിക്കൻ പൗരന്മാരും മരണമടഞ്ഞിരുന്നു. ഒടുവിലായി പുറത്തുവരുന്ന റിപ്പോർട്ടുകൾ പ്രകാരം മരണസംഖ്യ 90 കടന്നു. അഫ്ഗാനിൽ നിന്നും പലായനം ചെയ്യുന്നവരുടെ തിരക്ക് വിമാനത്താവളത്തിൽ അനുഭവപ്പെടുന്നതിനിടെ നടന്ന ആക്രമണമായതിനാൽ ആഘാതം പതിന്മടങ്ങ് വർദ്ധിച്ചു.
തുർക്കി, ഖത്തർ, ഈജിപ്ത്, സൗദി അറേബ്യ തുടങ്ങിയ രാജ്യങ്ങളാണ് ആദ്യം അനുശോചനം അറിയിച്ചത്. മതം പറയുന്ന ഒരു പ്രമാണത്തിനും ഉൾകൊള്ളാൻ കഴിയാത്ത ആക്രമണമാണിതെന്ന് റിയാദ് അഭിപ്രായപ്പെട്ടപ്പോൾ, ഈ നീചപ്രവർത്തിയിൽ അഗാധദുഃഖമുണ്ടെന്നും, മരണപ്പെട്ടവരുടെ കുടുംബങ്ങളുടെ ദുഃഖത്തിൽ പങ്കുചേരുന്നു എന്നുമായിരുന്നു തുർക്കി വിദേശകാര്യമന്ത്രിയുടെ പ്രതികരണം.