November 06, 2021
November 06, 2021
കുവൈത്ത് സിറ്റി : കോവിഡ് രോഗികളുടെ ചികിത്സാർത്ഥം പ്രത്യേകം സ്ഥാപിച്ച മിശ്രിഫ് ഫീൽഡ് ആശുപത്രിയിലെ അവസാനരോഗിയും രോഗമുക്തി നേടി. ആശുപത്രി അധികൃതരും മറ്റ് ആരോഗ്യപ്രവർത്തകരും ചേർന്ന് യാത്രയയപ്പ് നൽകിയാണ് രോഗിയെ ഡിസ്ചാർജ് ചെയ്തത്. ആശുപത്രി ഡെപ്യൂട്ടി ഡയറക്ടർ ഡോക്ടർ ഫൗസി അൽ ഖവാരി ട്വിറ്ററിലൂടെയാണ് ഈ വാർത്ത പുറത്തുവിട്ടത്. വരും ദിവസങ്ങളിൽ പൂർണമായും കോവിഡ് മുക്തമായ രാജ്യമായി മാറാൻ കഴിയുമെന്ന പ്രതീക്ഷയിലാണ് കുവൈത്ത്.
രോഗികൾ ഇല്ലാത്തതിനാൽ രാജ്യത്തെ പല കോവിഡ് ചികിത്സാകേന്ദ്രങ്ങളും നേരത്തെ തന്നെ പ്രവർത്തനം അവസാനിപ്പിച്ചിരുന്നു. നിലവിൽ രാജ്യത്ത് ആകെ 18 പേരാണ് കോവിഡ് ബാധിച്ച് ചികിത്സയിൽ കഴിയുന്നത്. 99.33 ശതമാനമാണ് കുവൈത്തിന്റെ രോഗമുക്തി നിരക്ക്. ആരോഗ്യമേഖല കൈവരിച്ച അഭിനന്ദനാർഹമായ നേട്ടത്തിന് മുഴുവൻ ആരോഗ്യപ്രവർത്തകർക്കും നന്ദി പറയുന്നതായും, ആരോഗ്യമന്ത്രി ഡോ ബാസിൽ അസ്സബാഹ് കൃത്യമായ ഇടപെടലുകൾ നടത്തിയതിനാലാണ് ഈ നേട്ടം സാധ്യമായതെന്നും ഫൗസി അൽ ഖവാരി കൂട്ടിച്ചേർത്തു.