October 13, 2021
October 13, 2021
കുവൈത്ത് സിറ്റി : രാജ്യത്തിന്റെ സൈന്യത്തിൽ സ്ത്രീകൾക്കും ഇടമേകാനുള്ള ചരിത്രതീരുമാനവുമായി കുവൈത്ത്. നാല് വിവിധ തസ്തികകളിലേക്ക് കുവൈത്ത് സ്വദേശിനികളായ സ്ത്രീകൾക്ക് അപേക്ഷ സമർപ്പിക്കാമെന്ന് രാജ്യത്തിന്റെ പ്രതിരോധമന്ത്രിയും ഉപപ്രധാനമന്ത്രിയുമായ ശൈഖ് ഹമദ് ജാബിർ അൽ അലി അസ്സബാഹാണ് അറിയിച്ചത്. ഇതുസംബന്ധിച്ച ഔദ്യോഗിക ഉത്തരവ് പുറത്തിറക്കിയിട്ടുണ്ട്.
സ്പെഷാലിറ്റി ഓഫീസർ, മെഡിക്കൽ സർവീസസ്, മിലിറ്ററി സപ്പോർട്ട് സർവീസസ്, നോൺ കമീഷൻഡ് ഓഫീസർ തുടങ്ങിയ മേഖലയിലാണ് സ്ത്രീകൾക്ക് അവസരം ലഭിക്കുക. കുവൈത്ത് പോലീസിൽ വനിതകൾക്ക് പ്രത്യേകവിഭാഗം ഉണ്ടെങ്കിലും, സൈന്യത്തിൽ ആദ്യമായാണ് ഇവർക്ക് ഇടം ലഭിക്കുന്നത്. രാജ്യത്തെ സേവിക്കാനുള്ള അവസരത്തിനായി കാത്തിരിക്കുന്നവരാണ് കുവൈത്തി വനിതകളെന്നും, അവരുടെ കഴിവിൽ തനിക്ക് പരിപൂർണ വിശ്വാസമുണ്ടെന്നും പ്രതിരോധമന്ത്രി കുവൈത്ത് വാർത്താ ഏജൻസിയോട് പറഞ്ഞു.