March 18, 2022
March 18, 2022
കുവൈത്ത് സിറ്റി : ഈ ഞായറാഴ്ച മുതൽ കുവൈത്തിൽ സന്ദർശക വിസകൾ അനുവദിച്ചു തുടങ്ങുമെന്ന് ആഭ്യന്തര മന്ത്രാലയം അറിയിച്ചു. നേരത്തെ, കോവിഡ് പ്രതിസന്ധിയെ തുടർന്ന് സന്ദർശകവിസയ്ക്കുള്ള നിയമാവലികൾ കടുപ്പിച്ചിരുന്നു. പകർച്ചവ്യാധി നിയന്ത്രണവിധേയമായതോടെയാണ് ഈ കടുംപിടുത്തങ്ങൾ അവസാനിപ്പിക്കാൻ അധികൃതർ തയ്യാറായത്. മൂന്ന് മാസത്തെ കാലാവധിയുള്ള സന്ദർശകവിസകളാണ്ഞായറാഴ്ച മുതൽ അനുവദിക്കുക.
ഉറ്റവരെ കാണാൻ നാട്ടിലേക്ക് മടങ്ങാൻ അവധി ലഭിക്കാതെ, ദീർഘകാലമായി കുവൈത്തിൽ തുടരുന്ന പല പ്രവാസികൾക്കും ഈ തീരുമാനം ഏറെ ആശ്വാസകരമാണ്. കോവിഡ് എമർജൻസി കമ്മറ്റിയുടെ അനുമതിയോടെ മാത്രമാണ് ഇതുവരെ ഫാമിലി വിസകൾ അനുവദിച്ചിരുന്നത്. ഇതിന്റെ പ്രയോജനം ലഭ്യമാക്കാൻ മിക്ക പ്രവാസികൾക്കും കഴിഞ്ഞിരുന്നില്ല. നിയന്ത്രണങ്ങൾ നീക്കിയതോടെ കുടുംബത്തെ കുവൈത്തിലെത്തിക്കാനുള്ള ഒരുക്കത്തിലാണ് പ്രവാസികൾ. അപേക്ഷാ നടപടികൾ സുഗമമാക്കാൻ, ആവശ്യമായ മുഴുവൻ രേഖകളും ഹാജരാക്കാനും മന്ത്രാലയം നിർദേശിച്ചിട്ടുണ്ട്.