October 21, 2021
October 21, 2021
കോവിഡ് കേസുകളുടെ എണ്ണത്തിൽ തുടർച്ചയായി കുറവ് രേഖപ്പെടുത്തിയതോടെ കൂടുതൽ ഇളവുകൾ നൽകാൻ കുവൈത്ത് ഒരുങ്ങുന്നു. ഒക്ടോബർ 24 ഞായറാഴ്ച മുതൽ കുവൈത്ത് അന്താരാഷ്ട്ര വിമാനത്താവളത്തിന്റെ പ്രവർത്തനം പഴയപടി ആവുമെന്ന് അധികൃതർ അറിയിച്ചു. ഇതിന് വേണ്ട മുന്നൊരുക്കങ്ങൾ നടത്താൻ വ്യോമയാനവകുപ്പിനെ ചുമതലപ്പെടുത്തിയതായും മന്ത്രാലയം അറിയിച്ചു. രണ്ട് ഡോസ് വാക്സിനേഷനും സ്വീകരിച്ചവർക്ക് വിസ അനുവദിച്ചു നൽകാനുള്ള നടപടികളും ഇതോടെ ആരംഭിക്കും.
പൊതുഇടങ്ങളിൽ ഞായറാഴ്ച മുതൽ മാസ്ക് നിർബന്ധമല്ലെന്നും അധികൃതർ അറിയിച്ചു. അതേസമയം, അടച്ചിട്ട ഇടങ്ങളിൽ തുടർന്നും മാസ്ക് ധരിക്കണം. കോവിഡ് മാനദണ്ഡങ്ങൾ പാലിച്ചുകൊണ്ട് വിവാഹങ്ങളും സമ്മേളനങ്ങളും നടത്താനും അനുമതി നൽകുമെന്ന് അധികൃതർ വ്യക്തമാക്കിയിട്ടുണ്ട്. പള്ളികളിൽ പ്രാർത്ഥനയ്ക്ക് എത്തുന്നവർ ഇനി സാമൂഹികഅകലം പാലിക്കേണ്ടതില്ല എന്നും അധികൃതർ അറിയിച്ചു. സ്വന്തം വിരിപ്പ് കൊണ്ടുവരാനും, പള്ളിയിൽ മാസ്ക് ധരിക്കാനും സന്ദർശകർ തുടർന്നും ശ്രദ്ധിക്കണം.