January 01, 2020
January 01, 2020
തിരുവനന്തപുരം : നീതി ആയോഗിന്റെ സുസ്ഥിര വികസന സൂചികയില് കേരളം ഒന്നാമതെത്തിയതില് പ്രവാസികളുടെ സംഭാവനകള് വഹിച്ച പങ്ക് വലുതാണെന്ന് ഗവര്ണ്ണര് ആരിഫ് മുഹമ്മദ് ഖാന് പറഞ്ഞു. ലോക കേരള സഭയുടെ രണ്ടാം സമ്മേളനം തിരുവനന്തപുരം കനകക്കുന്നില് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
27 രാജ്യങ്ങളില് നിന്നായി 500 ലേറെ പേര് പങ്കെടുത്ത ഒന്നാം സമ്മേളനത്തിന്റെ ഭാഗമായി ഏഴു കമ്മിറ്റികള് രൂപീകരിച്ച് സര്ക്കാരിന് ശുപാര്ശകള് നല്കിയെന്നത് വളരെ അഭിനന്ദനാര്ഹമാണെന്ന് ഗവര്ണര് പറഞ്ഞു. ഈ ശുപാര്ശകളിന്മേല് സംസ്ഥാന സര്ക്കാര് കൈക്കൊണ്ട നടപടികള് പ്രവാസികളില് വലിയ വിശ്വാസമാണ് ഉണ്ടാക്കിയിരിക്കുന്നതെന്നും അതിന് തെളിവാണ് രണ്ടാം സമ്മേളനത്തിലെ വര്ധിച്ച പങ്കാളിത്തമെന്നും അദ്ദേഹം ചൂണ്ടിക്കാട്ടി. പ്രവാസികളുടെ ക്ഷേമം ഉറപ്പാക്കുന്നതിനും അവരുടെ പങ്കാളിത്തം സംസ്ഥാനത്തിന്റെ വികസനത്തിന് ഉറപ്പാക്കുന്നതിനും ലോക കേരള സഭ അവസരം ഉണ്ടാക്കുന്നു എന്നതാണ് ഏറ്റവും ശ്രദ്ധേയമെന്നും ഗവര്ണര് പറഞ്ഞു. ജനാധിപത്യ പ്രക്രിയയില് പ്രവാസികളുടെ പങ്കാളിത്തവും ഉറപ്പുവരുത്തുന്നതോടെ വികസന പ്രക്രിയയില് അത് ഉണ്ടാക്കുന്ന മാറ്റം വളരെ വലുതായിരിക്കും.
നമ്മുടെ ആളുകള് വിദേശ രാജ്യങ്ങളില് നേരിടുന്ന നിയമപരവും തൊഴില്പരവും മനുഷ്യാവകാശം സംബന്ധിച്ചുമുള്ള വിവിധ പ്രശ്നങ്ങള്ക്ക് പരിഹാരം ഉണ്ടാക്കാനുള്ള സ്ഥിരം സംവിധാനം രൂപീകരിക്കാന് സംസ്ഥാന, കേന്ദ്ര സര്ക്കാരുകളെ സഹായിക്കാന് ലോക കേരള സഭയ്ക്ക കഴിയുമെന്നും ഗവര്ണര് പ്രത്യാശ പ്രകടിപ്പിച്ചു. ചടങ്ങില് മുഖ്യമന്ത്രി പിണറായി വിജയന് അധ്യക്ഷനായിരുന്നു. നിരവധി മാതൃകകള് ലോകത്തിന് സംഭാവന ചെയ്ത കേരളം ലോക കേരള സഭയ്ക്ക് രൂപകൊടുത്തുകൊണ്ട് മറ്റൊരു മാതൃക കൂടി സൃഷ്ടിച്ചിരിക്കുകയാണെന്ന് ചടങ്ങില് മുഖ്യപ്രസംഗം നടത്തിയ സ്പീക്കര് പി.ശ്രീരാമകൃഷ്ണന് പറഞ്ഞു. ഇതൊരു നിക്ഷപ സംഗമമോ, നിക്ഷേപ കൂട്ടായ്മയോ അല്ല. മറിച്ച് യാതന അനുഭവിക്കുന്നവര് മുതല് വലിയ നിക്ഷേപകരും സംരംഭകരും വരെ അടങ്ങിയ വൈവിധ്യമാണെന്നും സ്പീക്കര് ചൂണ്ടിക്കാട്ടി.