September 23, 2019
September 23, 2019
തെഹ്‌റാൻ: മാസങ്ങൾക്ക് മുൻപ് ഇറാൻ പിടിച്ചെടുത്ത ബ്രിട്ടീഷ് കപ്പൽ ഉടൻ മോചിപ്പിക്കുമെന്നു സൂചന. സ്വീഡിഷ് ഉടമസ്ഥതയിലുള്ള എണ്ണക്കപ്പലായ സ്റ്റെന ഇംപെറോയ്ക്ക് തിരിച്ചുപോകാമെന്ന് ഇറാൻ സർക്കാർ വക്താവ് അലിയു റാബിഇ അറിയിച്ചു.
കപ്പൽ പിടിച്ചെടുത്തതുമായി ബന്ധപ്പെട്ട നിയമ നടപടികൾ പൂർത്തീകരിച്ചതായി അലിയു പറഞ്ഞു. എണ്ണക്കപ്പലിനെ മോചിപ്പിക്കാനുള്ള നടപടികളും പൂർത്തിയായി. കപ്പലിന് ഇനി രാജ്യം വിടാമെന്നും അദ്ദേഹം കൂട്ടിച്ചേർത്തു. അതേസമയം ബ്രിട്ടീഷ് എണ്ണ കപ്പലിന് എന്ന് തീരം വിടാൻ കഴിയുമെന്ന് ഇറാൻവ്യക്തമാക്കിയിട്ടില്ല.
രണ്ടു മാസം മുൻപാണ് ഹോർമുസ്‌ കടലിടുക്കിൽ വെച്ച് രാജ്യാന്തര സമുദ്രനിയമം ലംഘിച്ചെന്ന് ആരോപിച്ച് സ്റ്റെന ഇംപെറോ ഇറാൻ നാവികസേന പിടികൂടിയത്. സംഭവം മേഖലയിൽ പുതിയ രാഷ്ട്രീയ സംഘർഷത്തിനിടയാക്കിയിരുന്നു. എട്ട് ഇന്ത്യക്കാർ ഉൾപെടെ 23 ജീവനക്കാരാണ് കപ്പലിൽ ഉള്ളത്.
