September 07, 2019
September 07, 2019
കരാറിനു മുന്പ് രാജ്യം ഉപയോഗിച്ചിരുന്ന സംവിധാനത്തിന്റെ പതിന്മടങ്ങ് ശേഷിയുള്ളതാണു പുതുതായി ആരംഭിക്കുന്നത്.
തെഹ്റാന്: ആണവ കരാറിലെ കൂടുതല് നിയന്ത്രണങ്ങള് നീക്കിയ ഇറാന് ആണവ വികസന-ഗവേഷണ പ്രവര്ത്തനങ്ങള്ക്കുള്ള നടപടികള് ആരംഭിച്ചു. സമ്പുഷ്ടീകൃത യുറേനിയം സംഭരണി വര്ധിപ്പിക്കുന്നതിന്റെ ഭാഗമായി ആണവ പ്ലാന്റുകളിലെ സെന്ട്രിഫ്യൂജുകളില് ഇന്ധനം നിറച്ചുതുടങ്ങിയതായി ഇറാന് ഔദ്യോഗിക വൃത്തങ്ങള് അറിയിച്ചു.
ഇറാനിലെ നതാന്സിലുള്ള ആണവ സമ്പുഷ്ടീകരണ കേന്ദ്രത്തില് അത്യാധുനികമായ സെന്ട്രിഫ്യൂജുകള് ആരംഭിച്ചതായി ഇറാന് ആറ്റമിക് എനര്ജി ഓര്ഗനൈനേഷന് വക്താവ് ബെഹ്റോസ് കമാല്വന്ദി അറിയിച്ചു. ആണവ കരാറില് ഗവേഷണ-വികസന പ്രവര്ത്തനങ്ങള്ക്ക് ഏര്പ്പെടുത്തിയിരുന്ന നിയന്ത്രണങ്ങള് ഉപേക്ഷിച്ചുതുടങ്ങിയെന്നും കൂടുതല് വേഗമേറിയതും അത്യാധുനികവുമായ സെന്ട്രിഫ്യൂജുകളുടെ വികസനം ഇതില് ഉള്പ്പെടുമെന്നും കമാല്വന്ദി വ്യക്തമാക്കി.
കരാറിനു മുന്പ് രാജ്യം ഉപയോഗിച്ചിരുന്ന സംവിധാനത്തിന്റെ പതിന്മടങ്ങ് ശേഷിയുള്ളതാണു പുതുതായി ആരംഭിക്കുന്നത്. ആണവ കരാറിലെ മറ്റു കക്ഷികള് തങ്ങളുടെ വാഗ്ദാനങ്ങള് പൂര്ത്തീകരിക്കുകയാണെങ്കില് ഈ നടപടികളെല്ലാം പുനപരിശോധിക്കാനും ഇറാന് തയാറാണെന്നും അദ്ദേഹം അറിയിച്ചു.
ബുധനാഴ്ചയാണ് മൂന്നാംഘട്ട കരാര് വ്യവസ്ഥാ പിന്മാറ്റം ഇറാന് പ്രസിഡന്റ് ഹസന് റൂഹാനി പ്രഖ്യാപിച്ചത്. ഇതിന്റെ ഭാഗമായുള്ള നടപടികള്ക്കാണ് ഇന്നലെയും ഇന്നുമായി രാജ്യത്തെ ആണവ കേന്ദ്രത്തിലെ ഉദ്യോഗസ്ഥര് തുടക്കമിട്ടിരിക്കുന്നത്.