September 26, 2022
September 26, 2022
ന്യൂസ്റൂം ബ്യുറോ
കുവൈത്ത് സിറ്റി: കുവൈത്ത്സെൻട്രൽ ജയിൽ കോംപ്ലക്സിലേക്ക് മൂന്നു ഡ്രോണുകൾ പറന്നെത്തിയ സംഭവത്തിൽ അധികൃതർ അന്വേഷണം ഊർജിതമാക്കി. സുലൈബിയയിലെ സെൻട്രൽ ജയിൽ പരിസരത്തേക്കാണ് വെള്ളിയാഴ്ച മൂന്നു ഡ്രോണുകൾ അനധികൃതമായി പ്രവേശിച്ചത്. ജയിൽ പരിസരത്ത് ലാൻഡ് ചെയ്യാനുള്ള ശ്രമം പരാജയപ്പെടുത്തിയ സുരക്ഷാ ഉദ്യോഗസ്ഥർ . ഒരു ഡ്രോൺ പിടിച്ചെടുത്തു. മറ്റ് രണ്ടു ഡ്രോണുകൾ പറന്നകന്നു.
വെള്ളിയാഴ്ച സെൻട്രൽ ജയിൽ പരിസരത്തേക്ക് മൂന്നു ഡ്രോണുകൾ പ്രവേശിക്കുന്നത് സുരക്ഷാ ഉദ്യോഗസ്ഥരുടെ ശ്രദ്ധയിൽപ്പെടുകയായിരുന്നു. ജയിൽ പരിസരത്തുതന്നെ ലാൻഡ് ചെയ്യാനുള്ള ശ്രമത്തിനിടെ ഉദ്യോഗസ്ഥർ ഒരു ഡ്രോൺ പിടിച്ചെടുക്കുകയായിരുന്നു. മറ്റ് ഡ്രോണുകൾ അതിവേഗം പറന്നകന്നു. ഒന്ന് സുലൈബിയ ഭാഗത്തേക്കും മറ്റൊന്ന് അൽ-റാഖി മേഖലയിലേക്കുമാണ് രക്ഷപ്പെട്ടത്.
സംഭവത്തിനു പിന്നിലുള്ളവരെ കണ്ടെത്താനായി പിടിച്ചെടുത്ത ഡ്രോൺ ക്രിമിനൽ എവിഡൻസ് ഡിപ്പാർട്ട്മെൻ്റിനു കൈമാറി. സെൻട്രൽ ജയിൽ അധികൃതരും അന്വേഷണം പ്രഖ്യാപിച്ചിട്ടുണ്ട്. ഇതിൻ്റെ ഭാഗമായി ജയിൽ വാർഡുകളിൽ റെയ്ഡ് നടത്തി. 70 മൊബൈൽ ഫോണുകൾ, കേബിളുകൾ, ഇൻ്റർനെറ്റ് വിതരണ ഉപകരണങ്ങൾ, കത്തികൾ, മയക്കുമരുന്ന് തുടങ്ങിയവ കണ്ടെടുത്തു. തടവുകാരെ കേന്ദ്രീകരിച്ചാണ് അന്വേഷണം പുരോഗമിക്കുന്നതെന്നാണ് വിവരം.
ന്യൂസ്റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/HU1j0QE7i26GnMur8CmUvF എന്ന ലിങ്കിൽ ജോയിൻ ചെയ്യുക