October 15, 2021
October 15, 2021
കുവൈത്ത് സിറ്റി : വാക്സിനേഷൻ സർട്ടിഫിക്കറ്റിലെയും പാസ്പോർട്ടിലേയും വിവരങ്ങളിൽ പൊരുത്തക്കേടുണ്ടെന്ന് ചൂണ്ടിക്കാട്ടി യാത്രക്കാരെ തിരിച്ചയച്ചു. ലണ്ടനിലേക്ക് ടിക്കറ്റ് ബുക്ക് ചെയ്ത ചില യാത്രക്കാർക്കാണ് ദുരനുഭവമുണ്ടായത്. ചിലരുടെ പേരുകളിൽ അക്ഷരതെറ്റ് കടന്നുകൂടിയപ്പോൾ, ചില വാക്സിനേഷൻ സർട്ടിഫിക്കറ്റുകളിൽ പേര് മുഴുവനായും രേഖപ്പെടുത്തിയിരുന്നില്ല.
യാത്ര ചെയ്യാനുള്ള അവസരം നഷ്ടപ്പെട്ടതോടെ, വിമാനടിക്കറ്റിനും, ഹോട്ടലിനും പീസീആർ ടെസ്റ്റിനുമായി മുടക്കിയ തുക തങ്ങൾക്ക് നഷ്ടപ്പെട്ടതായി യാത്രക്കാർ അറിയിച്ചു. പ്രശ്നങ്ങൾ പരിഹരിക്കാൻ എയർപോർട്ടിൽ ആരോഗ്യമന്ത്രാലയത്തിന്റെ ഓഫീസ് ലഭ്യമല്ലാത്തതിലുള്ള പ്രതിഷേധം പ്രകടിപ്പിക്കാനും യാത്രക്കാർ മറന്നില്ല. ഇതിനുള്ള വിശദീകരണവുമായി മന്ത്രാലയം രംഗത്തെത്തിയിട്ടുണ്ട്. മിഷ്രീഫിലുള്ള വാക്സിനേഷൻ കേന്ദ്രത്തിൽ തെറ്റുകൾ തിരുത്താനുള്ള സൗകര്യം ഒരുക്കിയിട്ടുണ്ടെന്നും, കൃത്യമായ രേഖകൾ ഹാജരാക്കിയാൽ വാക്സിനേഷൻ സർട്ടിഫിക്കറ്റിൽ തിരുത്തലുകൾ വരുത്താമെന്നും അധികൃതർ വ്യക്തമാക്കി.
