March 22, 2022
March 22, 2022
കുവൈത്ത് സിറ്റി : പ്രമുഖ മലയാള വാർത്താ ചാനലായ ഏഷ്യാനെറ്റ് ന്യൂസിന്റെ നഴ്സിങ് എക്സലൻസ് അവാർഡ് ജൂറി ചെയർമാനായി ഡോ. മോഹൻ തോമസിനെ തിരഞ്ഞെടുത്തു. കുവൈത്ത് എഡിഷന്റെ ജൂറി ചെയർമാനായാണ് ഖത്തറിലെ പ്രമുഖ ഡോക്ടറും, സാമൂഹികപ്രവർത്തനരംഗത്തെ നിറസാന്നിധ്യവുമായ മോഹൻ തോമസിനെ തിരഞ്ഞെടുത്തത്. ഒപ്പം, ട്രെയിൻഡ് നഴ്സസ് അസോസിയേഷൻ ഓഫ് ഇന്ത്യ പ്രസിഡന്റ് ഡോ.റോയ്. കെ. ജോർജ്, ഇന്ത്യൻ ഡോക്ടേഴ്സ് ഫോറം കുവൈത്ത് പ്രസിഡന്റ് അമീർ അഹമ്മദ്, ട്രെയിൻഡ് നഴ്സസ് അസോസിയേഷൻ കേരള പ്രസിഡന്റ് ഡോ. സോന, പെൻസിൽവാനിയ സ്റ്റേറ്റ് ബോർഡ് ഓഫ് നഴ്സിങ് എ.പി.എൻ ചെയർപേഴ്സൺ ബ്രിജിത് വിൻസെന്റ് തുടങ്ങിയവരും ജഡ്ജിങ് പാനലിലുണ്ട്.
കുവൈത്തിലെ നഴ്സിങ് രംഗത്തെ സമഗ്രസംഭാവനകൾ കണക്കിലെടുത്താണ് ലൈഫ് ടൈം അച്ചീവ്മെന്റ് അവാർഡ് നൽകുന്നത്. കോവിഡ് കാലത്ത് മികച്ച സേവനം കാഴ്ചവെച്ചവർക്കുള്ള പ്രത്യേക അവാർഡും നൽകും. നഴ്സ് ഓഫ് ദി ഇയർ എന്ന പേരിലും അവാർഡ് നൽകും. അൻപതിനായിരം രൂപയും പ്രശസ്തി പത്രവും അടങ്ങുന്നതാണ് പുരസ്കാരം. കുവൈത്തിലെ മില്ലേനിയം ഹോട്ടലിൽ നടക്കുന്ന ചടങ്ങിൽ, മാർച്ച് 26 നാണ് പുരസ്കാരങ്ങൾ നൽകുക.