November 19, 2021
November 19, 2021
ന്യൂഡൽഹി : പഞ്ചാബിലും ഉത്തർപ്രദേശിലും തെരഞ്ഞെടുപ്പ് നടക്കാനിരിക്കെ വിവാദമായ കാർഷിക നിയമങ്ങൾ പിൻവലിച്ച് പ്രധാനമന്ത്രി. ഗുരു നാനാക്ക് ജയന്തി ദിനത്തിലാണ് പ്രധാനമന്ത്രിയുടെ നിർണായക പ്രഖ്യാപനം. മൂന്ന് കാർഷിക നിയമങ്ങളും പിൻവലിക്കുമെന്ന് പ്രധാനമന്ത്രി അറിയിച്ചു. പാർലമെൻ്റിൻ്റെ അടുത്ത സമ്മേളനത്തിൽ തന്നെ ഇതുമായി ബന്ധപ്പെട്ട നടപടികൾ ഉണ്ടാവും.
കർഷക സമരം നടത്തിവന്ന സംഘടനകളെ രൂക്ഷമായ ഭാഷയിൽ വിമർശിച്ചുകൊണ്ടാണ് പ്രധാനമന്ത്രി നിർണായക പ്രഖ്യാപനം നടത്തിയത്. ആത്മാർത്ഥമായി കൊണ്ടുവന്ന നിയമങ്ങൾ ഒരു വിഭാഗം കർഷകരിൽ അതൃപ്തിയുണ്ടാക്കി. കർഷകരുടെ ബുദ്ധിമുട്ടുകൾ തനിക്കറിയാം. അതുകൊണ്ടാണ് നിയമം കൊണ്ടുവന്നത്.
അതേസമയം, കർഷക സമരം തുടരുന്ന സാഹചര്യത്തിൽ പഞ്ചാബ് ഉൾപ്പെടെയുള്ള പല സംസ്ഥാനങ്ങളിലും ബിജെപിക്ക് കാലു കുത്താൻ കഴിയാത്ത സാഹചര്യമാണ്.എണ്ണൂറിലധികം കർഷകർക്കാണ് ഒരു വർഷത്തോളമായി തുടരുന്ന സമരത്തിന്റെ ഭാഗമായി ജീവൻ നഷ്ടപ്പെട്ടത്.നിരവധി പേർ ആത്മഹത്യ ചെയ്തു.കൊടും തണുപ്പിൽ ആരോഗ്യകാരണങ്ങളാൽ മരണപ്പെട്ട കർഷകരും നിരവധിയാണ്.
