April 15, 2024
April 15, 2024
ഗസ: ഗസയിൽ ഇസ്രയേൽ സൈന്യത്തിന്റെ ആക്രമണം 192 ദിവസം പിന്നിട്ടിട്ടും, കൂട്ടക്കുരുതി ഇപ്പോഴും തുടരുകയാണ്. ഓരോ മണിക്കൂർ പിന്നിടുമ്പോഴും ഗസയിൽ മരണസംഖ്യയും ഉയരുന്നുണ്ട്.
വടക്കൻ ഗസയിലേക്ക് കുടുംബവുമായി മടങ്ങുന്നതിനിടെ അഞ്ചു വയസുകാരിയെ ഇസ്രായേൽ സൈന്യം വെടിവെച്ചുകൊന്നു. സാലി അബു ലൈല എന്ന അഞ്ച് വയസുകാരി സഹോദരിമാരോടും ഉമ്മയോടുമൊപ്പം തന്റെ വീട്ടിലേക്ക് മടങ്ങുന്നതിനിടയിലാണ് ഇസ്രായേൽ സൈന്യം ആക്രമണം നടത്തിയത്. ജീവൻ നഷ്ടപെട്ട മകളുടെ ശരീരം കെട്ടിപ്പിടിച്ച് വിതുമ്പുന്ന ഉമ്മയുടെ ദൃശ്യങ്ങൾ ഫലസ്തീനിയൻ ഫോട്ടോഗ്രാഫർ ആറ്റിയ ഡാർവിഷ് സോഷ്യൽ മീഡിയയിൽ പങ്കുവെച്ചു. വടക്കൻ ഗസയിലേക്ക് മടങ്ങാൻ ശ്രമിച്ച നൂറുകണക്കിന് ഫലസ്തീനികൾക്കൊപ്പമായിരുന്നു ഇവരുമുണ്ടായിരുന്നത്. സ്വന്തം വീടുകളിലേക്കും നാടുകളിലേക്കും പോകാൻ ശ്രമിച്ച നിരവധി പേർക്ക് നേരെ ഇസ്രായേൽ സൈന്യം വെടിയുതിർത്തതായും റിപ്പോർട്ടുണ്ട്.
ഇസ്രായേൽ സൈന്യത്തെ കണ്ട് പേടിച്ചുപോയ അവളെ ചേർത്ത് പിടിച്ച് നിൽക്കുന്നതിനിടയിലാണ് മകൾക്ക് മുഖത്ത് വെടിയേറ്റതെന്ന് സബ്രീൻ ഉമ്മ പറഞ്ഞു. സബ്രീൻ തന്റെ നാല് മക്കൾക്കൊപ്പം ചെക്ക് പോയന്റിലെത്തിയപ്പോഴാണ് സൈന്യം വെടിയുതിർത്തത്.
'ഞാൻ എന്റെ മകളെ നിലത്ത് കിടത്താൻ ശ്രമിച്ചു, പക്ഷേ അവൾ അനങ്ങുന്നുണ്ടായിരുന്നില്ല. എന്റെ കൈകൾ അപ്പോഴേക്കും ചോരയിൽ കുളിച്ചു, ഞാൻ അവളെ തട്ടി വിളിച്ചു, പക്ഷേ അവൾക്ക് ഒന്നും പ്രതികരിക്കാൻ കഴിഞ്ഞിരുന്നില്ല. ഉടനെ ആശുപത്രിയിലെത്തിച്ചെങ്കിലും രക്ഷിക്കാനായില്ല’ സബ്രീൻ പറഞ്ഞു.
അതേസമയം, ഗസയിലെ നുസൈറത്ത് അഭയാർഥി ക്യാമ്പിന് സമീപമുള്ള വീടിന് നേരെ ഇസ്രായേൽ നടത്തിയ വ്യോമാക്രമണത്തിൽ അഞ്ച് പേർ കൊല്ലപ്പെട്ടു. നിരവധി പേർക്ക് ഗുരുതര പരിക്കേറ്റതായി വാർത്താ ഏജൻസിയായ വഫ റിപ്പോർട്ട് ചെയ്തു. ക്യാമ്പിന് സമീപത്തെ പള്ളിയും, റെസിഡൻഷ്യൽ ടവറും ബോംബാക്രമണത്തിൽ പൂർണമായും തകർന്നു.
വടക്കൻ ഗസയിലെ സൈന്യം സ്ഥാപിച്ച മണൽകെട്ടുകൾക്കിടയിൽ നിന്ന് നിരവധി മൃതദേഹങ്ങൾ കണ്ടെത്തിയതായി മെഡിക്കൽ വൃത്തങ്ങളും അറിയിച്ചു. ഖാൻ യൂനിസിലെ വിവിധ പ്രദേശങ്ങളിൽ നിന്ന് നാല് പേരുടെ മൃതദേഹങ്ങളും കണ്ടെടുത്തു.
ആംബുലൻസുകൾക്കും രക്ഷാപ്രവർത്തകർക്കും വിവിധയിടങ്ങളിൽ എത്തിച്ചേരാനാകാത്ത സാഹചര്യമാണ് ഇപ്പോഴുമുള്ളത്. നൂറ്കണക്കിന് ആളുകൾ ഇപ്പോഴും കെട്ടിട അവശിഷ്ടങ്ങൾക്കടിയിൽ കുടുങ്ങിക്കിടക്കുന്നതായി റിപ്പോർട്ടുകളുണ്ട്. ഒക്‌ടോബർ ഏഴ് മുതൽ കൊല്ലപ്പെട്ടവരുടെ എണ്ണം 33,729 ആയി. 76,371 പേർക്ക് പരിക്കേറ്റു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
