March 17, 2024
March 17, 2024
മസ്കത്ത്: ഒമാനില് അടിയന്തര രക്തദാനത്തിന് ആഹ്വാനം ചെയ്ത് ആരോഗ്യമന്ത്രാലയം. റമദാന് മാസത്തില് രക്തബാങ്കുകള്ക്ക് ക്ഷാമം നേരിടാനുള്ള സാധ്യത കണക്കിലെടുത്താണ് നിര്ദേശം. സെന്ട്രല് ബ്ലഡ് ബാങ്കില് 2,700-ലധികം രക്തദാതാക്കളും 260 പ്ലേറ്റ്ലെറ്റ് ദാതാക്കളും ആവശ്യമായി വരും. നിലവില് 24 പ്ലേറ്റ്ലെറ്റുകളും 308 ദാതാക്കളുമാണുള്ളത്.
റമദാനില്, ബൗഷറിലെ സെന്ട്രല് ബ്ലഡ് ബാങ്കില് രാത്രി 7.30 മുതല് 11.30 വരെ രക്തദാനത്തിന് അവസരമുണ്ട്. ഞായറാഴ്ച മുതല് വ്യാഴാഴ്ച വരെ രാവിലെ 8 മുതല് ഉച്ചയ്ക്ക് 12.30 വരെയും രാത്രി 10.30 വരെയും പ്ലേറ്റ്ലെറ്റ് ദാനം ചെയ്യാന് കഴിയും.
പ്ലേറ്റ്ലെറ്റുകളുടെ ആവശ്യകത:
അപകടങ്ങള്, പൊള്ളല്, ഓപ്പണ് ഹാര്ട്ട് പോലുള്ള വലിയ ശസ്ത്രക്രിയകള്, മജ്ജ-കരള് മാറ്റിവയ്ക്കല്, കഠിനമായ രക്തസ്രാവം, എന്നീ സന്ദര്ഭങ്ങളില് കേന്ദ്ര ബ്ലഡ് ബാങ്കിന് പ്രതിദിനം 10 പ്ലേറ്റ്ലെറ്റ് ദാതാക്കളെ ആവശ്യമുണ്ട്. പ്രസവം, വളര്ച്ച എത്താത്ത നവജാത ശിശുക്കള്, പ്ലേറ്റ്ലെറ്റുകളുടെ കുറവ് അനുഭവിക്കുന്ന രോഗികള്, കാന്സര് രോഗികള്, പ്രത്യേകിച്ച് കീമോതെറാപ്പിക്ക് വിധേയരായവര് എന്നിവര്ക്ക് ചികിത്സാ കാലയളവിലുടനീളം പതിവായി പ്ലേറ്റ്ലെറ്റ് ട്രാന്സ്ഫ്യൂഷന് ആവശ്യമാണ്.
രക്തകോശങ്ങളെ വേര്തിരിക്കുന്നതിനുള്ള പ്രത്യേക തരം ഉപകരണം ഉപയോഗിച്ച് രക്തം ശേഖരിക്കും. നിശ്ചിത ബാഗുകളിലാണ് പ്ലേറ്റ്ലെറ്റുകള് ശേഖരിക്കുന്നത്. ഏകദേശം 45 മുതല് 60 മിനിറ്റ് സമയത്തില് പ്ലേറ്റ്ലെറ്റുകളെ പ്രത്യേക ഉപകരണങ്ങള് ഉപയോഗിച്ച് ബാക്കി രക്തഘടകങ്ങളില് നിന്ന് വേര്തിരിക്കും.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F