September 21, 2023
September 21, 2023
മസ്കത്ത്: ഒമാന്റെ ബജറ്റ് എയർലൈനായ സലാം എയർ ഇന്ത്യയിലേക്കുള്ള വിമാന സർവിസുകൾ ഒക്ടോബർ ഒന്ന് മുതൽ നിർത്തുന്നു. ഇന്ത്യയിലേക്ക് വിമാനങ്ങൾ അനുവദിക്കുന്നതിലുള്ള പരിമിതികൾ കാരണമാണ് സർവിസുകൾ നിർത്തുന്നതെന്ന് സലാം എയർ വ്യക്തമാക്കി. സലാം എയർ വെബ്സൈറ്റിൽ നിന്നും ഒക്ടോബർ ഒന്ന് മുതലുള്ള ബുക്കിങ്ങ് സൗകര്യവും നിർത്തി വെച്ചിട്ടുണ്ട്.
റിസർവേഷൻ ചെയ്ത എല്ലാ യാത്രക്കാർക്കും മുഴുവൻ തുകയും റീഫണ്ട് ലഭിക്കുന്നതായിരിക്കും. റീ ഫണ്ടിനെ കുറിച്ചുള്ള കൂടുതൽ വിവരങ്ങൾക്ക് സലാം എയറിനെ ബന്ധപ്പടാവുന്നതാണെന്നും കമ്പനി അധികൃതർ വ്യക്തമാക്കി. അതേസമയം, എത്ര കാലത്തേക്കാണ് വിമാന സർവീസ് നിർത്തുന്നത് എന്നതിനെ കുറിച്ച് അധികൃതർ വ്യക്തത നൽകിയിട്ടില്ല.
സാധാരണക്കാരായ മലയാളികളടക്കമുള്ള പ്രവാസികൾക്ക് ഇത് വലിയ തിരിച്ചടിയാകും. ഒമാനിൽ നിന്ന് ഇന്ത്യയിലേക്ക് കുറഞ്ഞ നിരക്കിൽ യാത്ര ചെയ്യാൻ കഴിഞ്ഞിരുന്ന സർവീസായിരുന്നു സലാം എയർ. കോഴിക്കോട്, തിരുവനന്തപുരം, ജയ്പൂർ, ലഖ്നൗ എന്നീ നഗരങ്ങളിലേക്കാണ് സലാം എയർ ഇന്ത്യയിലേക്ക് സർവിസ് നടത്തുന്നത്. കോഴിക്കോട്ടേക്ക് സലാലയിൽ നിന്നാണ് നിലവിൽ വിമാനമുള്ളത്. ഒക്ടോബർ ഒന്ന് മുതൽ മസ്കത്തിൽ നിന്ന് കോഴിക്കോട്ടേക്ക് നേരിട്ട് വിമാനം ആരംഭിക്കാനിരിക്കെയാണ് അപ്രതീക്ഷിതമായി ഇന്ത്യയിലേക്ക് സലാം എയർ സർവീസ് നിർത്തലാക്കുന്നത്.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/G3GYQhfaTLoDVK1Qr9fc5G