April 18, 2024
April 18, 2024
ദോഹ: 2024-ലെ ലോകത്തിലെ ഏറ്റവും മികച്ച എയർപോർട്ട് ആയി ദോഹയിലെ ഹമദ് ഇന്റർനാഷണൽ എയർപോർട്ട് തിരഞ്ഞെടുക്കപ്പെട്ടു. ഇന്നലെ (ബുധൻ) ഫ്രാങ്ക്ഫർട്ടിലെ പാസഞ്ചർ ടെർമിനൽ എക്സ്പോയിൽ നടന്ന വേൾഡ് എയർപോർട്ട് അവാർഡ് ചടങ്ങിലാണ് പ്രഖ്യാപനമുണ്ടായത്. കൂടാതെ, തുടർച്ചയായി പത്താം വർഷവും മിഡിൽ ഈസ്റ്റിലെ ഏറ്റവും മികച്ച വിമാനത്താവളത്തിനുള്ള അവാർഡും, തുടർച്ചയായി രണ്ടാം വർഷവും ലോകത്തിലെ ഏറ്റവും മികച്ച എയർപോർട്ട് ഷോപ്പിംഗ് അവാർഡും ഹമദ് ഇന്റർനാഷണൽ എയർപോർട്ട് നേടി.
2023 ഓഗസ്റ്റ് മുതൽ 2024 മാർച്ച് വരെ നടത്തിയ സർവേ കാലയളവിൽ 100-ലധികം രാജ്യങ്ങളിലെ വിമാനത്താവള ഉപഭോക്താക്കൾ പൂർത്തിയാക്കിയ വേൾഡ് എയർപോർട്ട് സർവേ ചോദ്യാവലിയെ അടിസ്ഥാനമാക്കിയാണ് അവാർഡുകൾ നൽകിയത്. ചെക്ക്-ഇൻ, അറൈവൽ, ട്രാൻസിറ്റ്, ഷോപ്പിംഗ്, സെക്യൂരിറ്റി / ഇമിഗ്രേഷൻ തുടങ്ങിയവയെല്ലാം വിലയിരുത്തും.
12 തവണ മുൻ ജേതാക്കളായ സിംഗപ്പൂർ ചാംഗി എയർപോർട്ട് ആഗോള റാങ്കിംഗിൽ രണ്ടാം സ്ഥാനം നേടി. ഏഷ്യയിലെ ഏറ്റവും മികച്ച എയർപോർട്ട്, ലോകത്തിലെ ഏറ്റവും മികച്ച എയർപോർട്ട് ഇമിഗ്രേഷൻ സർവീസ് എന്നിവയ്ക്കുള്ള അവാർഡുകളും സിംഗപ്പൂർ നേടി.
ഏറ്റവും വലിയ, വാർഷിക ആഗോള വിമാനത്താവള ഉപഭോക്തൃ സംതൃപ്തി സർവേയിൽ ഉപഭോക്താക്കൾ വോട്ട് ചെയ്ത എയർപോർട്ട് വ്യവസായത്തിനുള്ള അംഗീകാരങ്ങളാണ് വേൾഡ് എയർപോർട്ട് അവാർഡുകൾ. 1999 മുതലാണ് വേൾഡ് എയർപോർട്ട് അവാർഡുകൾ ആരംഭിച്ചത്.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F