September 25, 2023
September 25, 2023
മസ്കത്ത്: ഖത്തറിൽ നടന്ന ടി20 ഐ ഗൾഫ് ക്രിക്കറ്റ് ചാമ്പ്യൻഷിപ്പിൽ ഒമാന് വിജയ കിരീടം. ദോഹയിലെ ഏഷ്യൻ ടൗൺ ക്രിക്കറ്റ് സ്റ്റേഡിയത്തിൽ നടന്ന മത്സരത്തിൽ യു.എ.ഇയെ 5 വിക്കറ്റിന് തകർത്താണ് ഗൾഫ് ടി20 കിരീടം ഒമാൻ സ്വന്തമാക്കിയത്. ഒമാൻ ടീമിന്റെ ക്യാപ്റ്റൻ ആക്വിബ് ഇല്യാസാണ് 'പ്ലെയർ ഓഫ് ദി മാച്ച്'.
ബാറ്റിങ്ങിലും ബൗളിങ്ങിലും മികച്ച പ്രകടനമാണ് ഒമാൻ ടീം കാഴ്ച്ച വെച്ചത്. യു.എ.ഇയുടെ ആദ്യ ബാറ്റിൽ 20 ഓവറിൽ 5 വിക്കറ്റ് നഷ്ടത്തിൽ 163 റൺസെടുത്തു..ശേഷം ബാറ്റിങ്ങിനിറങ്ങിയ ആക്വിബ് ഇല്യാസ് (33 ബാളിൽ 67 റൺസ്), അയാൻഖാൻ (38 ബാളിൽ 53 റൺസ്), ശുഹൈബ്ഖാൻ (22) എന്നിവരുടെ മികച്ച ബാറ്റിങ്ങ് പ്രകടനത്തിലൂടെ ഒമാൻ മുൻപിലെത്തുകയായിരുന്നു. നാലു സിക്സും, ഒരു വിക്കറ്റും എട്ടു ഫോറുമാണ് ആക്വിബ് നേടിയത്. അയാൻ ഖാന് നാലു ഫോറും ലഭിച്ചു.
അതേസമയം, യു.എ.ഇയുടെ മുഹമ്മദ് വസീം (46), ആസിഫ് ഖാൻ (38), ഹാസിൽ ഹമീദ് (36) എന്നിവരുടെ ശക്തമായ ബാറ്റിങ്ങിലൂടെ നല്ല സ്കോറാണ് യു.എ.ഇ നേടിയത്. ലീഗ് റൗണ്ടിലെ ആദ്യ മത്സരത്തിൽ ഒമാൻ യു.എ.ഇയോട് പരാജയപ്പെട്ടിരുന്നു. ടി20 മത്സരത്തിന്റെ ആദ്യ ഘട്ടത്തിൽ ടൂർണമെന്റിൽ നിന്ന് പുറത്താകുമെന്ന നിലയിലായിരുന്നു ഒമാൻ ടീം. എന്നാൽ, അവസാന മത്സരങ്ങളിൽ ശക്തമായ പ്രകടനം നടത്തി ഒമാൻ കിരീടം സ്വന്തമാക്കുകയായിരുന്നു.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/G3GYQhfaTLoDVK1Qr9fc5G