February 09, 2023
February 09, 2023
ന്യൂസ്‌റൂം ബ്യുറോ
മസ്കത്ത്:ഒമാനിൽ നടന്ന നാലാമത് 'സിനിമാന' ഇന്റര്‍നാഷനല്‍ ഫിലിം ഫെസ്റ്റിവലില്‍ മലയാള ചിത്രം ആയിഷക്ക്‌ അംഗീകാരം.
മത്സരവിഭാഗത്തില്‍ ചിത്രത്തിന്റെ പശ്ചാത്തല സംഗീതത്തിന് എം. ജയചന്ദ്രനാണ് പുരസ്കാരത്തിന് അര്‍ഹനായത്.. അറബ്‌ -ഇന്ത്യന്‍ സംഗീതങ്ങളെ അസാധരണമാം വിധം സംയോജിപ്പിച്ച പശ്ചാത്തല സംഗീതമാണു ആയിഷയുടേതെന്ന് ജൂറി അഭിപ്രായപ്പെട്ടു.
ഇന്തോ-അറബിക്‌ പശ്ചാത്തലത്തില്‍ ഒരുക്കിയ ചിത്രത്തിനു അറബ്‌ ഫെസ്റ്റിവലില്‍ ലഭിക്കുന്ന അംഗീകാരം എന്ന പ്രത്യേകത കൂടി ഈ അവാര്‍ഡിനുണ്ട്‌. മുസന്ധം ഐലന്റില്‍ വെച്ച് നടന്ന ഫെസ്റ്റിവലിന്റെ സമാപന ചടങ്ങില്‍ മുസന്ധം ഗവര്‍ണറേറ്റ് പ്രവിഷ്യാ ഗവര്‍ണര്‍ സയ്യിദ് ഇബ്രാഹിം ബിന്‍ സെയ്ദ് അല്‍ ബുസൈദി അവാര്‍ഡ് ദാനം നടത്തി. മഞ്ജു വാര്യരാണ് ആയിഷയിലെ കേന്ദ്ര കഥാപാത്രം. നിലമ്പൂര്‍ ആയിഷയുടെ സൗദി ജീവിതം ആസ്പദമാക്കി ഒരുക്കിയ ചിത്രത്തിന്റെ സംവിധായകന്‍ ആമിര്‍ പള്ളിക്കലാണ്.
സിനിമാന'യുടെ നാലാമത് പതിപ്പ് ഇത്തവണ മസ്കത്ത്, മുസന്ദം ഗവര്‍ണറേറ്റുകളിലായിരുന്നു നടന്നത്. ഒമാന്‍, സിറിയ, ടുണീഷ്യ, സൗദി അറേബ്യ, കുവൈത്ത്, ഇറാഖ്, ഇറാന്‍, ബഹ്‌റൈന്‍, സെര്‍ബിയ, ഇന്ത്യ എന്നിവിടങ്ങളില്‍ നിന്നുള്ള 120ലധികം ചിത്രങ്ങളാണ് പ്രദര്‍ശിപ്പിച്ചത്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/CZ8evyItpDFGmuyTIzjnaL എന്ന ലിങ്കിൽ ജോയിൻ ചെയ്യുക
