February 02, 2022
February 02, 2022
മസ്കത്ത് : ലോകകപ്പ് യോഗ്യതാ മത്സരത്തിൽ കരുത്തരായ ഓസ്ട്രേലിയയെ ഒമാൻ സമനിലയിൽ തളച്ചു. വാശിയേറിയ പോരാട്ടത്തിൽ ഇരുടീമുകളും രണ്ട് തവണ വീതം വലകുലുക്കി. ബൗഷർ സുൽത്താൻ ഖാബൂസ് സ്റ്റേഡിയത്തിൽ നടന്ന മത്സരത്തിൽ രണ്ട് തവണ ഓസ്ട്രേലിയ ലീഡ് എടുത്തെങ്കിലും ആതിഥേയർ വീറോടെ തിരിച്ചടിക്കുകയായിരുന്നു. കോവിഡ് വ്യാപനം കണക്കിലെടുത്ത് അടച്ചിട്ട സ്റ്റേഡിയത്തിലായിരുന്നു മത്സരം.
പതിനഞ്ചാം മിനിറ്റിൽ ജാമിൽ മാക്ലറീൻ നേടിയ ഗോളിലൂടെയാണ് ഓസ്ട്രേലിയ മുന്നിലെത്തിയത്. പെനാൽറ്റി സ്പോട്ടിൽ നിന്നായിരുന്നു ഗോൾ. രണ്ടാംപകുതിയിൽ അബ്ദുള്ള ഫവാസിലൂടെ ഒമാൻ ഒപ്പമെത്തി. കളി തീരാൻ മിനിറ്റുകൾ ശേഷിക്കെ ആരോൺ മൂയി കങ്കാരുക്കൾക്ക് വീണ്ടും ലീഡ് നൽകി. എന്നാൽ, പെനാൽറ്റി സ്പോട്ടിൽ നിന്നും തന്റെ രണ്ടാം ഗോൾ കണ്ടെത്തിയ ഫവാസിലൂടെ ഒമാൻ സമനില സ്വന്തമാക്കി. ഗ്രൂപ്പ് ബിയിൽ 15 പോയിന്റുള്ള ഓസ്ട്രേലിയ മൂന്നാമതും 8 പോയിന്റുമായി ഒമാൻ നാലാമതുമാണ്.