March 29, 2022
March 29, 2022
ദോഹ : ദോഹ അസംബ്ലിയിലെ പ്രഭാഷകരുടെ പട്ടികയിൽ നിന്നും അഫ്ഗാൻ വിദേശകാര്യമന്ത്രി ആമിർ ഖാൻ മുത്തഖിയുടെ പേര് നീക്കം ചെയ്തു. ഇന്ന് രാവിലെ വരെ പട്ടികയിൽ മന്ത്രി ഉണ്ടായിരുന്നെന്നും, ഏതാനും മണിക്കൂറുകൾക്ക് മുൻപാണ് ഇയാളെ ഒഴിവാക്കിയതെന്നും റിപ്പോർട്ടുകളുണ്ട്. പെൺകുട്ടികളുടെ വിദ്യാഭ്യാസസ്വാതന്ത്ര്യം അടക്കമുള്ള വിഷയങ്ങളിലെ താലിബാൻ നിലപാടിനോടുള്ള പ്രതിഷേധത്തിന്റെ ഭാഗമായാണ് നടപടി എന്നാണ് സൂചനകൾ.
നേരത്തെ, താലിബാനുമായി ദോഹയിൽ നടക്കുന്ന ചർച്ചകളിൽ പങ്കെടുക്കില്ലെന്ന് അമേരിക്ക അറിയിച്ചിരുന്നു. മിക്ക ലോകരാജ്യങ്ങളും ഇതേ നിലപാടാണ് സ്വീകരിച്ചത്. താലിബാന്റെ നയതന്ത്ര ഓഫീസ് ദോഹയിൽ പ്രവർത്തിക്കുന്നുണ്ടെങ്കിലും ഒരു രാജ്യവും ഇതുവരെ താലിബാനോട് സൗഹൃദചർച്ചകൾ നടത്തിയിട്ടില്ല. അന്താരാഷ്ട്ര സമൂഹത്തിൽ ഒറ്റപ്പെട്ടുതുടങ്ങിയതിന് പിന്നാലെ, ഇതുവരെ പ്രശ്നങ്ങൾക്ക് മധ്യസ്ഥത വഹിച്ച ഖത്തറും കയ്യൊഴിയുന്നത് താലിബാന് കനത്ത തിരിച്ചടി ആയേക്കുമെന്ന് രാഷ്ട്രീയനിരീക്ഷകർ അഭിപ്രായപ്പെട്ടു.
