April 14, 2020
April 14, 2020
മനാമ / കുവൈത്ത് സിറ്റി : ബഹ്റൈനിലും കുവൈത്തിലും ചൊവ്വാഴ്ച ഓരോ ആൾ വീതം കോവിഡ്19 ബാധിച്ചു മരിച്ചു.കുവൈത്തിൽ കോവിഡ് മൂലമുള്ള മൂന്നാമത്തെ മരണമാണ് ഇന്ന് ആരോഗ്യമന്ത്രാലയം സ്ഥിരീകരിച്ചത്. തീവ്രപരിചരണ വിഭാഗത്തിൽ കഴിഞ്ഞിരുന്ന 79 വയസ്സുള്ള കുവൈത്തി വനിതയാണ് മരിച്ചത്. നേരത്തെ 50 വയസ്സുള്ള കുവൈത്ത് പൗരനും, 46 കാരനായ ഗുജറാത്ത് സ്വദേശിയും കോവിഡ് മൂലം മരിച്ചിരുന്നു.
പുതുതായി 55 പേർക്ക് കൂടി കോവിഡ് 19 സ്ഥിരീകരിച്ചതോടെ രാജ്യത്തെ കോവിഡ് കേസുകളുടെ എണ്ണം 1355 ആയി. ഇന്ന് രോഗം സ്ഥിരീകരിച്ചവരിൽ 29 പേർ ഇന്ത്യക്കാരാണ്. ഇതോടെ രാജ്യത്തെ കോവിഡ് ബാധിതരായ ഇന്ത്യക്കാരുടെ എണ്ണം 753 ആയി. പുതിയ രോഗികളിൽ 26 ഇന്ത്യക്കാർ ഉൾപ്പെടെ 43 പേർ നേരത്തെ കോവിഡ് സ്ഥിരീകരിച്ചവരുമായുള്ള സമ്പർക്കത്തെ തുടർന്നു നിരീക്ഷണത്തിൽ കഴിഞ്ഞിരുന്നവരാണ്. 3 ഇന്ത്യക്കാർ ഉൾപ്പെടെ 9 പേർക്ക് രോഗം ബാധിച്ചത് എങ്ങിനെയെന്ന് വ്യക്തമായിട്ടില്ല. ബ്രിട്ടൻ, ജർമനി എന്നിവിടങ്ങളിൽ നിന്ന് നിന്ന് മടങ്ങിയെത്തിയ 3 കുവൈത്ത് പൗരന്മാർക്കും പുതുതായി രോഗം സ്ഥിരീകരിച്ചിട്ടുണ്ട് .
ബഹ്റൈനിൽ കോവിഡ് ബാധിച്ച് ചികിത്സയിലായിരുന്ന 60കാരനായ ബഹ്റൈൻ പൗരനാണ് ഇന്ന് മരിച്ചത്. ഇതോടെ രാജ്യത്ത് കോവിഡ് ബാധിച്ച് മരിച്ചവരുടെ എണ്ണം ഏഴായി. 763 പേരാണ് നിലവിൽ രാജ്യത്ത് ചികിൽസയിൽ കഴിയുന്നത്. ചികിൽസയിലുളളവരിൽ ഭൂരിഭാഗവും പ്രവാസികളാണ്. ഇവരിൽ 135 പേർ ഇന്ത്യക്കാരാണെന്ന് ആരോഗ്യ മന്ത്രാലയം ഔദ്യോഗികമായി സ്ഥിരീകരിച്ചിട്ടുണ്ട്.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക.
