September 04, 2022
September 04, 2022
ദോഹ: വോളീബോൾ പ്രേമികളുടെ ഖത്തറിലെ കൂട്ടായ്മയായ വോളിഖ് 'ആസാദി കാ അമൃത് മഹോത്സവിൻ്റെ ' ഭാഗമായി സംഘടിപ്പിച്ച ഏകദിന വോളിബോൾ ടൂർണമെന്റിൽ - കോൺഫിഡൻ്റ് കപ്പ് ആസാദി വോളി ഫെസ്റ്റ് - തൃശൂർ ജില്ലാ സഹൃദയ വേദി ജേതാക്കളായി. ആസ്പയർ ഡോമിൽ നടന്ന അന്തിമ പോരാട്ടത്തിൽ ഇൻകാസ് കോഴിക്കോടിനെ ഒന്നിനെതിരെ രണ്ട് സെറ്റുകൾക്ക് പരാജയപ്പെടുത്തിയാണ് വോളിബോളിലെ കന്നിയങ്കത്തിൽ തന്നെ ടീ ജെ എസ് വി കപ്പിൽ മുത്തമിട്ടത്.
കെ എം സി സി കോഴിക്കോട്, വിവ വടകര എന്നീ ടീമുകളും മാറ്റുരച്ച ടൂർണമെന്റിലെ ലീഗ് റൗണ്ടിൽ മൂന്ന് മത്സരങ്ങളിൽ നിന്ന് പരജയമറിയാതെ ഇൻകാസ് കലാശപ്പോരാട്ടത്തിന് യോഗ്യത നേടിയിരുന്നു. ഇൻകാസിനോട് പരാജയം ഏറ്റുവാങ്ങി ഗ്രൂപ്പിൽ രണ്ടാം സ്ഥനക്കാരായാണ് ടി ജെ എസ് വി കിരീടപ്പോരാട്ടത്തിന് അവസരം നേടിയത്. ക്യാപ്ടൻ അബിനാസിൻ്റെ തകർപ്പൻ കളിയിൽ ടി ജെ എസ് വി തോൽവിക്ക് പകരം വീട്ടി കിരീടം ചൂടുകയായിരുന്നു.
ഇന്ത്യൻ എംബസി ഡിഫൻസ് അറ്റാഷെ ക്യാപ്ടൻ മോഹൻ അട്ല ഏകദിന ടൂർണമെൻ്റ് ഉൽഘാടനം ചെയ്തു.. ഇന്ത്യൻ സ്പോർട്സ് സെൻ്റർ അഡ്വൈസറി ബോർഡ് ചെയർമാൻ മുഹമ്മദ് ഈസ, ഐ എസ് സി ജനറൽ സെക്രട്ടറി ശ്രീനിവാസൻ എന്നിവർ ആദ്യ മത്സരത്തിലെ കളിക്കാരെ പരിചയപ്പെട്ടു. ഇൻഡോ - ഖത്തർ വോളിബോൾ രംഗത്തെ സമഗ്ര സംഭാവനകൾ മുൻനിർത്തി മുൻ ഖത്തർ മിലിട്ടറി ടീം താരം അബ്ദുള്ള കേളോത്തിന് 'പ്രവാസി കായിക ശ്രേഷ്ഠ' പുരസ്കാരം സമ്മാനിച്ചു. മുൻ ഇൻ്റർനാഷണൽ താരം കൂടിയായ ഖത്തർ വോളിബോൾ അസോസിയേഷൻ സെക്രട്ടറി യൂസഫ് കാനു അബ്ദുള്ള കേളോത്തിന് മെമൻ്റോ കൈമാറി.
ടൂർണമൻ്റിലെ ഏറ്റവും മികച്ച കളിക്കാരനായി ടി ജെ എസ് വി ക്യാപ്റ്റൻ അബിനാസ് തെരഞ്ഞെടുക്കപ്പെട്ടു. ജേതാക്കൾക്കുള്ള ട്രോഫികളും പ്രൈസ് മണിയും ഇന്ത്യൻ സ്പോർട്സ് സെൻ്റർ പ്രസിഡൻ്റ് ഡോ. മോഹൻ തോമസ് വിതരണം ചെയ്തു.. ഇൻ്റർനാഷണൽ റഫറി മനോജ് കുമാറിൻ്റെ നേതൃത്വത്തിൽ നസീം പുനത്തിൽ, മുഹമ്മദ് വി ടി, ബഷീർ ടി ടി കെ, സുധൻ, സമീർ പുനത്തിൽ, സുജേഷ്, ആഷിക്ക് മാഹി, ഹാരിസ് സി എന്നിവർ മത്സരങ്ങൾ നിയന്ത്രിച്ചു.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ https://chat.whatsapp.com/DoTp5mITouhJcwHKcDKLsm എന്ന ലിങ്കിൽ ജോയിൻ ചെയ്യുക
