October 01, 2022
October 01, 2022
ന്യൂസ്‌റൂം ബ്യുറോ
ദോഹ : ഖത്തർ ലോകകപ്പിനുള്ള ടിക്കറ്റ് വിൽപനയുടെ അവസാനഘട്ടത്തിലും വൻ തിരക്കനുഭവപ്പെട്ടതായി അധികൃതർ അറിയിച്ചു.ഇക്കഴിഞ്ഞ 27ന് അവസാന ഘട്ട ടിക്കറ്റ് വിൽപ്പന ആരംഭിച്ച് ആദ്യ രണ്ടോ മൂന്നോ മണിക്കൂറിനുള്ളിൽ 120,000 ടിക്കറ്റുകൾ വിറ്റുപോയതായി സെയിൽസ്, മാർക്കറ്റിംഗ്, കമ്മ്യൂണിക്കേഷൻ എക്സിക്യൂട്ടീവ് ഡയറക്ടർ ഹസൻ റാബിയ അൽ-കുവാരി അൽ കാസ് ടിവിയോട് പറഞ്ഞു.അൽ-മജ്‌ലിസ് പരിപാടിയിൽ സംസാരിക്കുന്നതിനിടെയാണ് അദ്ദേഹം ഇക്കാര്യം പറഞ്ഞത്. പല ഘട്ടങ്ങളിലായി ഇതുവരെ,ഏകദേശം 2.7 മില്യൺ ടിക്കറ്റുകൾ വിറ്റുകഴിഞ്ഞതായും അദ്ദേഹം കൂട്ടിച്ചേർത്തു.
ആവശ്യക്കാർ വളരെ കൂടുതലായതിനാൽ ടിക്കറ്റുകളുടെ ലഭ്യത മത്സരങ്ങൾക്കനുസരിച്ച് വ്യത്യാസപ്പെടുമെന്നും പങ്കെടുക്കുന്ന ടീമുകൾക്കായി ഫിഫ തന്നെ പലപ്പോഴും ടിക്കറ്റുകൾ ബുക്ക് ചെയ്യാറുണ്ടെന്നും അദ്ദേഹം വിശദീകരിച്ചു.
ടിക്കറ്റുകൾ നേരിട്ട് മറ്റൊരാൾക്ക് കൈമാറാൻ കഴിയില്ലെന്നും എന്നാൽ ഔദ്യോഗിക പ്ലാറ്റ്‌ഫോം വഴി മാത്രം ഇത് സാധ്യമാകുമെന്നും അൽ-കുവാരി ചൂണ്ടിക്കാട്ടി.ഔദ്യോഗിക സൈറ്റിലൂടെയും പ്ലാറ്റ്‌ഫോമിലൂടെയും മാത്രം ടിക്കറ്റുകൾ വിൽക്കുന്നതിനാൽ അനൗദ്യോഗിക വെബ്‌സൈറ്റുകൾക്കും ടിക്കറ്റിന്റെ പേരിലുള്ള തട്ടിപ്പുകൾക്കുമെതിരെ ജാഗ്രത പുലർത്തണമെന്നും അദ്ദേഹം മുന്നറിയിപ്പ് നൽകി.
ടൂർണമെന്റിന്റെ അവസാനം വരെ ടിക്കറ്റ് വിൽപ്പന തുടരുമെങ്കിലും സ്റ്റേഡിയങ്ങളിൽ ടിക്കറ്റ് വിൽപന ഉണ്ടായിരിക്കില്ലെന്നും അദ്ദേഹം സൂചിപ്പിച്ചു.
ടിക്കറ്റുകളുടെ പുനർവിൽപനക്കുള്ള ഔദ്യോഗിക പ്ലാറ്റ്‌ഫോമായ മൊബൈൽ ആപ് ഈ മാസം പുറത്തിറക്കുമെന്ന് അധികൃതർ നേരത്തെ അറിയിച്ചിരുന്നു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/HU1j0QE7i26GnMur8CmUvF എന്ന ലിങ്കിൽ ജോയിൻ ചെയ്യുക
