March 15, 2023
March 15, 2023
ന്യൂസ്‌റൂം ബ്യൂറോ
ദോഹ: 51-ാമത് അമീര്‍ കപ്പ് ക്വാര്‍ട്ടര്‍ ഫൈനല്‍, സെമി ഫൈനല്‍ മത്സരങ്ങളുടെ ഷെഡ്യൂള്‍ ഖത്തര്‍ ഫുട്ബോള്‍ അസോസിയേഷന്‍ (ക്യുഎഫ്എ) പ്രഖ്യാപിച്ചു.
ഏപ്രില്‍ 8നാണ് ക്വാര്‍ട്ടര്‍ ഫൈനല്‍ ആരംഭിക്കുക. തുടര്‍ച്ചയായ നാലു ദിവസങ്ങളിലായാണ് മത്സരം. റമ്ദാന്‍ മാസമായതിനാല്‍ ക്വാര്‍ട്ടര്‍ ഫൈനല്‍ മത്സരങ്ങളെല്ലാം രാത്രി 9.45നാണ് ആരംഭിക്കുക. അബ്ദുള്ള ബിന്‍ ഖലീഫ സ്റ്റേഡിയത്തില്‍ നടക്കുന്ന മത്സരത്തില്‍ അല്‍ അറബി, മഐതറിനെ നേരിടും.
അടുത്തദിവസം ജാസിം ബിന്‍ ഹമദ് സ്റ്റേഡിയത്തില്‍ അല്‍ ഗരാഫ അല്‍ ഷഹാനിയയെ നേരിടും. ഏപ്രില്‍ 10ന് നിലവിലെ ചാമ്പ്യന്മാരായ അല്‍ ദുഹൈലും അല്‍ സെയ്ലിയയും തമ്മില്‍ ഏറ്റുമുട്ടും.
അബ്ദുള്ള ബിന്‍ ഖലീഫ സ്റ്റേഡിയത്തില്‍ നടക്കുന്ന അവസാന ക്വാര്‍ട്ടര്‍ ഫൈനലില്‍ അല്‍ സദ്ദും ഉം സലാലും ഏറ്റുമുട്ടും.
ഏപ്രില്‍ 24, 25 തീയതികളില്‍ വൈകുന്നേരം 6.45ന് സെമി ഫൈനലുകള്‍ നടക്കും. ഫൈനലിന്റെ ഷെഡ്യൂള്‍ ഇതുവരെ പ്രഖ്യാപിച്ചിട്ടില്ല.
