October 11, 2022
October 11, 2022
അൻവർ പാലേരി
ദോഹ : ലോകകപ്പ് വേളയിൽ സ്റ്റേഡിയങ്ങളിൽ കാൽപ്പന്തിന്റെ ചലനങ്ങൾക്കൊപ്പം ആരവങ്ങളുയരുമ്പോൾ ഖത്തറിലെ പൊതുഇടങ്ങൾ കലാസാംസ്കാരികാനുഭവങ്ങളുടെ കാൻവാസാക്കാൻ ഒരുങ്ങുകയാണ് ഖത്തർ മ്യുസിയം.രാജ്യത്തെത്തുന്ന സന്ദർശകർക്ക് മികച്ച കലാ,സാംസ്കാരികാനുഭവങ്ങൾ പകരാൻ രാജ്യത്തുടനീളം നാൽപതോളം കലാസൃഷ്ടികളും ഇൻസ്റ്റലേഷനുകളും സ്ഥാപിക്കാനുള്ള ശ്രമങ്ങളാണ് പുരോഗമിക്കുന്നത്.
ജെഫ് കൂൺസ്, യായോയ് കുസാമ, ഷൗഖ് അൽ മന തുടങ്ങിയ അന്തർദേശീയ, പ്രാദേശിക കലാകാരന്മാരുടെ ഇൻസ്റ്റാളേഷനുകളാണ് ദോഹയിലെ സൂഖ് വാഖിഫ് മുതൽ പലയിടങ്ങളിലായി സ്ഥാപിക്കുന്നത്.ഖത്തറിലെ വൈവിധ്യമാർന്ന സാംസ്കാരിക പ്രവർത്തനങ്ങൾ പ്രോത്സാഹിപ്പിക്കുന്നതിനുള്ള ഒരു വർഷം നീണ്ടുനിൽക്കുന്ന 'ഖത്തർ ക്രിയേറ്റ്സി'ന്റെ ഭാഗമായാണ് പദ്ധതി നടപ്പാക്കുന്നത്.
"നഗര കേന്ദ്രത്തിന് ചുറ്റും മാത്രമല്ല, പടിഞ്ഞാറൻ തീരത്തെ അൽ സുബാറ പ്രദേശത്തേക്ക് പോലും ഈ കലാപ്രവർത്തനങ്ങൾ വ്യാപിപ്പിക്കാനാണ് ലക്ഷ്യമാക്കുന്നത്. നിരവധി വ്യത്യസ്ത കലാകാരന്മാരെ ഒരു രാജ്യത്തേക്ക് ഒരുമിച്ച് കൊണ്ടുവരികയും സമൂഹത്തിലെ വ്യത്യസ്ത അംഗങ്ങളുമായി സംവദിക്കാനും സംഭാഷണം നടത്താനും പൊതുസ്ഥലങ്ങളിലെ ഇത്തരം കലാസൃഷ്ടികളിലൂടെ കഴിയും.” പബ്ലിക് ആർട് ക്യൂറേറ്റോറിയൽ പ്ലാനിംഗ് മേധാവി സാറാ ലോലർ ഒരു ഓൺലൈൻ പോർട്ടലിനോട് പറഞ്ഞു.
ജെഫ് കൂൺസ് "ഡുഗോങ്"എന്ന കലാസൃഷ്ടി 21 x 31 മീറ്റർ വലുപ്പത്തിലുള്ള കൂറ്റൻ ശിൽപമാണ്..നൂറ്റാണ്ടുകളായി ഖത്തറിന്റെ ഉപദ്വീപിന് ചുറ്റുമുള്ള ജലാശയങ്ങളിൽ വസിച്ചിരുന്ന പുരാതന സമുദ്ര സസ്തനിയുടെ മാതൃകയിൽ നിർമിച്ച ശിൽപം ദോഹയിലെ അൽ മസ്റ പാർക്കിലാണ് സ്ഥാപിക്കുന്നത്.
ലെബനൻ ആർട്ടിസ്റ്റ് സിമോൺ ഫത്തൽ സുബാറയിൽ സ്ഥാപിക്കാനായി ടെന്റുകളുടെ ആകൃതിയിൽ മൂന്ന് നീല ഗ്രാനൈറ്റ് ശിൽപങ്ങളാണ് പൂർത്തിയാക്കുന്നത്. പ്രദേശത്തിന്റെ ചരിത്രവും നാടോടി പാരമ്പര്യവും പ്രതിഫലിപ്പിക്കുന്നതായിരിക്കും ഈ ശിൽപം.
40 പുതിയ ഇൻസ്റ്റാളേഷനുകളിൽ ഖത്തറി കലാകാരന്മാരായ ഷൗഖ് അൽ മനയുടെയും ഷുവാ അലിയുടെയും കലാസൃഷ്ടികൾ ആദ്യമായാണ് ആർട് ഗാലറികൾക്ക് പുറത്ത് ഇടം പിടിക്കുന്നത്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/Dg5TqG6OdNJIDasvwIm1qY എന്ന ലിങ്കിൽ ജോയിൻ ചെയ്യുക
