December 26, 2022
December 26, 2022
ന്യൂസ്‌റൂം ബ്യുറോ
ദോഹ :ഖത്തർ സംസ്‌കൃതിയുടെ ഈ വർഷത്തെ സി.വി ശ്രീരാമൻ സാഹിത്യ പുരസ്‌കാര സമർപ്പണം ഡിസംബർ 30 വൈകീട്ട് 6.30 ന് ദോഹയിലെ ഐസിസി അശോക ഹാളിൽ നടക്കുമെന്ന് ഭാരവാഹികൾ അറിയിച്ചു. സാംസ്കാരിക പരിപാടികളും, ഡോ. ഇ. പി. രാജഗോപാലന്റെ പ്രഭാഷണവും, മറ്റു കലാ പരിപാടികളും ചടങ്ങിന്റെ ഭാഗമായി നടക്കും.
അമേരിക്കൻ പ്രവാസിമലയാളിയായ പ്രിയ ജോസഫ് രചിച്ച ''മാണീം ഇന്ദിരാഗാന്ധീം" എന്ന കഥയാണ് ഈ വർഷം പുരസ്കാരത്തിന് അർഹമായത്. മികച്ച മലയാള ചെറുകഥയ്ക്ക് നൽകുന്ന നിലവിലെ ഏറ്റവും വിലയേറിയ പ്രവാസി ചെറുകഥാപുരസ്കാരമാണ് സംസ്കൃതി- സി.വി ശ്രീരാമൻ സാഹിത്യപുരസ്കാരം. 50,000 രൂപയും പ്രശസ്തിഫലകവും ഉൾപ്പെടുന്നതാണ് പുരസ്കാരം. സാഹിത്യകാരനും നിരൂപകനുമായ ഡോ. ഇ.പി രാജഗോപാലൻ ചെയർമാനും, സാഹിത്യകാരന്മാരായ അഷ്ടമൂർത്തി, ഷിനിലാൽ എന്നവർ അംഗങ്ങളുമായ സമിതിയാണ് ഈ വർഷത്തെ പുരസ്കാരത്തിനു അർഹമായ ചെറുകഥ തെരെഞ്ഞെടുത്തത്.
യശ:ശരീരനായ സാഹിത്യകാരൻ സി.വി ശ്രീരാമന്റെ സ്മരണാർത്ഥം 2014 മുതൽ ജിസിസി രാഷ്ട്രങ്ങളിൽ താമസിക്കുന്ന പ്രവാസി മലയാളികൾക്ക് മാത്രമായാണ് പുരസ്കാരം നൽകിയിരുന്നത്. 2022 മുതൽ ലോകമെമ്പാടുമുള്ള പ്രവാസികളുടെ രചനകൾ കൂടി ഉൾപെടുത്തിയതിനെ തുടർന്ന് ഈ വർഷം ജപ്പാൻ, ആസ്ട്രേലിയ, യൂറോപ്യൻ രാജ്യങ്ങൾ, കാനഡ, അമേരിക്ക എന്നിവിടങ്ങളിൽ നിന്നടക്കമുള്ള നിരവധി കഥകൾ മത്സരത്തിനായി ലഭിക്കുകയും ചെയ്തിരുന്നു.ഈ കഥകളിൽ നിന്നാണ് പ്രിയ ജോസഫ് രചിച്ച ''മാണീം ഇന്ദിരാഗാന്ധീം" എന്ന കഥ പുരസ്കാരത്തിനായി തെരഞ്ഞെടുത്തത്.
ഇടുക്കി ജില്ലയിലെ തൊടുപുഴ സ്വദേശിയായ പ്രിയ ജോസഫ് . ഭര്‍ത്താവ് റോബിനും മക്കൾക്കുമൊപ്പം ഷിക്കാഗോയിലാണ് താമസിക്കുന്നത്. ഐ. ടി. മേഖലയില്‍ ജോലി ചെയ്യുന്നു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/HHOGGyLPTMH45QRaxZQRyz എന്ന ലിങ്കിൽ ജോയിൻ ചെയ്യുക
