September 03, 2019
September 03, 2019
ദോഹ : ഇന്നലെ ദോഹയിൽ നടന്ന ഇന്ത്യ-ഖത്തർ സൗഹൃദ വോളിബോൾ മത്സരത്തിൽ രണ്ടിനെതിരെ മൂന്ന് സെറ്റുകൾക്ക് ഇന്ത്യ ഖത്തറിനെ പരാജയപ്പെടുത്തി.ഇരുപതാമത് ഏഷ്യൻ വോളിബോൾ ചാമ്പ്യൻഷിപ്പിന്റെ സന്നാഹമത്സരങ്ങൾക്കും പരിശീലനത്തിനുമായി ദോഹയിലെത്തിയതായിരുന്നു ഇന്ത്യൻ ടീം.
ഉക്കാരപന്ദ്യന്റെ നേതൃത്വത്തിൽ ഖത്തർ വോളിബോൾ അസോസിയേഷൻ ഹാളിൽ നടന്ന മത്സരത്തിൽ ദീപേഷിന്റെ ബ്ലോക്കിങ് മികവിലും അജിത് ലാലിന്റെ ആക്രമണത്തിലും ഇഞ്ചോടിഞ്ച് പോരാട്ടത്തിലാണ് ആദ്യ സെറ്റ് സ്വന്തമാക്കിയത്.. രണ്ടാം സെറ്റ് മുബാറക്കിന്റെ ആക്രമണ മികവിൽ ഖത്തർ പിടിച്ചെടുത്തു. മൂന്നാം സെറ്റും ഖത്തർ നേടിയെങ്കിലും വിനീത് ചൗധരി അറ്റാക്കിങ്ങിൽ ജ്വലിച്ചു നിന്ന നാലും അഞ്ചും സെറ്റുകൾ കരസ്ഥമാക്കി വിദേശ കോച്ച് ഡ്രാഗൻ മഹയിലോവിച്ചിന്റെ ശിക്ഷണത്തിൽ ഇന്ത്യ വിജയം സ്വന്തമാക്കുകയായിരുന്നു.
ഇന്ന് വൈകീട്ട് അഞ്ചു മണിക്ക് ഇതേ വേദിയിൽ നടക്കുന്ന രണ്ടാമത് മത്സരത്തിൽ പങ്കെടുക്കാൻ ഇന്ത്യയുടെ മിന്നും താരം പ്രഭാകരനും ഇറങ്ങുന്നുണ്ട്. കാണികൾക്ക് പ്രവേശനം സൗജന്യമാണ്.
സെപ്തംബർ 13 മുതല്‍ 21 വരെ തെഹ്റാനില്‍ നടക്കുന്ന ഇരുപതാമത് ഏഷ്യന്‍ സീനിയര്‍ പുരുഷവിഭാഗം ചാമ്പ്യൻഷിപ്പിൽ പങ്കെടുക്കുന്ന ഇന്ത്യന്‍ ടീം പന്ത്രണ്ട് ദിവസത്തെ പരിശീലന-മത്സര പരിപാടികള്‍ക്കായാണ് ദോഹയില്‍ എത്തിയത്.
