January 18, 2023
January 18, 2023
ന്യൂസ്‌റൂം ബ്യുറോ
ദോഹ : ഖത്തർ അമീർ ശൈഖ് തമീം ബിൻ ഹമദ് അൽതാനി യു.എ.ഇ തലസ്ഥാനമായ അബുദാബിയിൽ എത്തി.ഇരു രാജ്യങ്ങളും തമ്മിലുള്ള സൗഹൃദം ഊട്ടിയുറപ്പിക്കുന്നതിന്റെ ഭാഗമായി ഇന്ന് ഉച്ചയ്ക്ക് ശേഷം നടക്കുന്ന യോഗത്തിൽ പങ്കെടുക്കാനായാണ് അമീർ അബുദാബിയിൽ എത്തിയത്.
പ്രസിഡൻഷ്യൽ ഇന്റർനാഷണൽ വിമാനത്താവളത്തിൽ യു.എ.ഇ പ്രസിഡണ്ട് ശൈഖ് മുഹമ്മദ് ബിൻ സായിദ് അൽ നഹ്യാൻ അമീറിനെയും പ്രതിനിധി സംഘത്തെയും സ്വീകരിച്ചതായി അമീരി ദിവാൻ അറിയിച്ചു.അബുദാബി എക്‌സിക്യൂട്ടീവ് കൗൺസിൽ ഡെപ്യൂട്ടി ചെയർമാൻ ശൈഖ് ഹസാ ബിൻ സായിദ് അൽ നഹ്യാൻ, ദേശീയ സുരക്ഷാ ഉപദേഷ്ടാവ് ശൈഖ് തഹ്‌നൂൻ ബിൻ സായിദ് അൽ നഹ്യാൻ, ഉപപ്രധാനമന്ത്രി ശൈഖ് മൻസൂർ ബിൻ സായിദ് അൽ നഹ്യാൻ എന്നിവരും സ്വീകരണത്തിൽ പങ്കെടുത്തു.
ലോകകപ്പിന് മുന്നോടിയായി യു.എ.ഇ ഭരണാധികാരി ഖത്തർ സന്ദർശിച്ചിരുന്നു.2017 ലെ ഉപരോധത്തിന് ശേഷം ഖത്തറും യു.എ.ഇയും തമ്മിലുള്ള ബന്ധം കൂടുതൽ മെച്ചപ്പെടുന്നതിന്റെ സൂചനയായാണ് ഇരു നേതാക്കളുടെയും പരസ്പര സന്ദർശനം വിലയിരുത്തപ്പെടുന്നത്.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/JSu55PzLuSjIOAiVOpZz2i എന്ന ലിങ്കിൽ ജോയിൻ ചെയ്യുക
