January 19, 2023
January 19, 2023
ന്യൂസ്‌റൂം ബ്യുറോ
ദോഹ :മുപ്പതിനായിരത്തോളം ഫുട്‍ബോൾ ആരാധകരെ സാക്ഷിയാക്കി ബുധനാഴ്ച വൈകുന്നേരം ഖലീഫ ഇന്റർനാഷണൽ സ്റ്റേഡിയത്തിൽ നടന്ന പാരീസ് സെന്റ് ജെർമെയ്ൻ (പിഎസ്ജി) പരിശീലന മൽസരം ശ്രദ്ധേയമായി.
സൂപ്പർ താരങ്ങളായ ലയണൽ മെസ്സി, കൈലിയൻ എംബാപ്പ, നെയ്മർ എന്നിവരുടെ നേതൃത്വത്തിൽ പിഎസ്ജി താരങ്ങൾ രണ്ട് മണിക്കൂറോളം ആരാധകർക്ക് മുന്നിൽ പരിശീലനം നടത്തി.ലുസൈൽ സ്റ്റേഡിയത്തിൽ അർജന്റീനയെ ലോകകപ്പ് കിരീടത്തിലേക്ക് നയിച്ച ഫൈനൽ പോരാട്ടത്തിന് കൃത്യം ഒരു മാസത്തിന് ശേഷമാണ് മെസ്സി ഉൾപ്പെടെയുള്ള താരങ്ങൾ വീണ്ടും ഖത്തറിൽ ബൂട്ടണിഞ്ഞത്.പരിശീലന മത്സരങ്ങൾക്കുള്ള ടിക്കറ്റുകൾ ദിവസങ്ങൾക്ക് മുമ്പേ വിറ്റഴിഞ്ഞിരുന്നു.
ലോകകപ്പ് ജേതാവ് ലയണൽ മെസ്സി, റണ്ണർഅപ്പ് കൈലിയൻ എംബാപ്പെ, ബ്രസീൽ താരങ്ങളായ നെയ്മർ, ക്യാപ്റ്റൻ മാർക്വിനോസ്, മൊറോക്കൻ സെൻസേഷൻ അക്രഫ് ഹക്കിമി എന്നിവരുൾപ്പെടെയുള്ള താരനിരയെ നേരിൽ കാണാൻ ആരാധകർക്ക് വീണ്ടും അവസരം ലഭിക്കുകയായിരുന്നു.പിഎസ്ജി പ്രസിഡന്റ് നാസർ അൽ ഖെലൈഫിയും പരിശീലനം കാണാൻ എത്തിയിരുന്നു.
ഖത്തറിലെ പ്രധാന ആകർഷക കേന്ദ്രങ്ങളായ ലുസൈൽ മറീന ഉൾപ്പെടെയുള്ള സ്ഥലങ്ങളിൽ സന്ദർശനം നടത്തിയ ശേഷമാണ് താരങ്ങൾ സ്റ്റേഡിയത്തിലെത്തിയത്.ഖത്തറിലെ പര്യടനം പൂർത്തിയാക്കി സൗദിയിലേക്ക് മടങ്ങുന്ന സംഘം ഇന്ന് രാത്രി റിയാദിലെ കിംഗ് ഫഹദ് സ്റ്റേഡിയത്തിൽ റൊണാള്‍ഡോയുടെ നേതൃത്വത്തിലുള്ള സഊദി ആള്‍ സ്റ്റാര്‍ ഇലവനുമായി ഏറ്റുമുട്ടും.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/JSu55PzLuSjIOAiVOpZz2i എന്ന ലിങ്കിൽ ജോയിൻ ചെയ്യുക
