May 13, 2020
May 13, 2020
Newsroom Exclusive
ദോഹ : ഖത്തറിലെ മലയാളിയായ പ്രമുഖ ബിസിനസുകാരന്റെ പേരിൽ ഫെയ്‌സ്ബുക്കിൽ വ്യാജ പ്രൊഫൈലുണ്ടാക്കി ഓൺലൈൻ തട്ടിപ്പിന് നീക്കം. മലപ്പുറം ചങ്ങരംകുളം സ്വദേശിയും എലൈറ്റ് ഗ്രൂപ് ഉൾപെടെ നിരവധി സ്ഥാപനങ്ങളുടെ ഉടമയുമായ സി.വി മുഹമ്മദലിയുടെ പേരിലാണ് വ്യാജ പ്രൊഫൈലുണ്ടാക്കി തട്ടിപ്പിന് ശ്രമം നടക്കുന്നത്.
സി.വി മുഹമ്മദലിയുടെ ഫോട്ടോ പ്രൊഫൈൽ ചിത്രമാക്കി അതേപേരിലുണ്ടാക്കിയ ഫെയ്‌സ്ബുക്ക് അക്കൗണ്ടിൽ നിന്ന് ഫ്രണ്ട് റിക്വസ്റ്റ് അയച്ച ശേഷം മെസ്സഞ്ചർ വഴി ബന്ധപ്പെട്ട് മൊബൈൽ നമ്പർ ആവശ്യപ്പെട്ടാണ് തട്ടിപ്പിന് തുടക്കം കുറിക്കുന്നത്. ഒരു മത്സരത്തിൽ പങ്കെടുക്കുന്നതിന് നാല്അക്ക ഓ.ടി.പി നമ്പർ അയക്കാമെന്നും അത് തിരികെ അയക്കാനും ആവശ്യപ്പെടും.ഇതിൽ സംശയം തോന്നിയ എടപ്പാൾ നടുവട്ടം സ്വദേശി മൻസൂർ മുഹമ്മദലിയുടെ മൊബൈൽ നമ്പർ തരപ്പെടുത്തി നേരിൽ ബന്ധപ്പെട്ടപ്പോഴാണ് തട്ടിപ്പിന്റെ നിജസ്ഥിതി ബോധ്യപ്പെട്ടത്.
ചൊവ്വാഴ്ച രാത്രി ഇത്തരത്തിൽ നിരവധി കോളുകൾ തനിക്ക് ലഭിച്ചതായും പോലീസിൽ പരാതി നൽകാൻ ഒരുങ്ങുകയാണെന്നും സി.വി മുഹമ്മദലി ന്യൂസ്‌റൂമിനോട് പറഞ്ഞു.മെസഞ്ചർ വഴിയും തിരിച്ചറിയാൻ പറ്റാത്ത നമ്പർ ഉപയോഗിച്ചുമാണ് തട്ടിപ്പു സംഘം ആളുകളുമായി ബന്ധപ്പെടുന്നത്. മൂന്നാമതൊരാളുടെ സമൂഹ മാധ്യമങ്ങളിലെ അക്കൗണ്ടോ ബാങ്ക് അക്കൗണ്ട് സംബന്ധിച്ച വിവരങ്ങളോ ഹാക്ക് ചെയ്യാനുള്ള നമ്പറാണ് ഇത്തരത്തിൽ മറ്റൊരാൾ വഴി തട്ടിപ്പുകാർ ശേഖരിക്കുന്നതെന്നാണ് സൂചന. അന്വേഷണമുണ്ടായാൽ ഈ നമ്പർ ഫോർവേർഡ് ചെയ്ത ആളായിരിക്കും പിടിക്കപ്പെടുക.ഫെയ്‌സ്ബുക്കിൽ അധികം സജീവമല്ലാത്ത ആളുകളുടെ പ്രൊഫൈൽ ഉപയോഗിച്ചാണ് ഇത്തരം തട്ടിപ്പുകൾക്ക് ശ്രമിക്കുന്നതെന്നും സൂചനയുണ്ട്.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക.
