August 16, 2023
August 16, 2023
ന്യൂസ്‌റൂം സ്പോർട്സ് ഡെസ്‌ക്
ദോഹ:ലോകകപ്പിന് ശേഷം കാൽപ്പന്തുകളിയുടെ ആവേശത്തിന് തീപിടിക്കുന്ന ക്ലബ് പോരാട്ടങ്ങൾക്ക് ഇന്ന് (ബുധനാഴ്ച) തുടക്കം. ഖത്തർ സ്റ്റാർസ് ലീഗ് (ക്യുഎസ്എൽ) 'എക്സ്പോ സ്റ്റാർസ് ലീഗ്' എന്ന പേരിലേക്ക് മാറ്റിയതായി കഴിഞ്ഞ ദിവസം അധികൃതർ പ്രഖ്യാപിച്ചിരുന്നു.
ക്ലബ്ബുകളുടെ ആദ്യ അഞ്ചു റൗണ്ട് മത്സരങ്ങൾക്കും ലോകകപ്പ് സ്റ്റേഡിയങ്ങൾ വേദിയാകുമെന്ന സവിശേഷതയും ഇത്തവണ ലീഗ് മത്സരങ്ങൾക്കുണ്ട്.
വക്‌റയിലെ അൽ ജനൂബ് സ്റ്റേഡിയത്തിൽ അൽ വക്‌റ ക്ലബും മുഐദർ ക്ലബും തമ്മിലുള്ള പോരാട്ടത്തോടെയാണ് മത്സരം ആരംഭിക്കുന്നത്. ഇന്ന് വൈകീട്ട് 6.30നാണ് മത്സരം ആരംഭിക്കുന്നത്. അതേസമയം, 8.30ന് അൽ തുമാമ സ്റ്റേഡിയത്തിൽ അൽ അറബി ക്ലബും അൽ ഷമാൽ ക്ലബ് തമ്മിലും ഇന്ന് പോരിനിറങ്ങും.
ആഗസ്റ്റ് 17ന് ഖത്തർ സ്പോർട്സ് ക്ലബും അൽ ഗറാഫ ക്ലബും തമ്മിൽ ഖലീഫ ഇന്റർനാഷണൽ സ്റ്റേഡിയത്തിൽ എറ്റുമുട്ടും. അൽ ജനൂബ് സ്റ്റേഡിയത്തിൽ റയ്യാനും അൽ മർഖിയയും തമ്മിലാണ് മറ്റൊരു മത്സരം. ആഗസ്റ്റ് 18ന് അൽ അഹ്‍ലി ക്ലബ് അൽ ദുഹൈൽ ക്ലബ്ബിനെ അൽ തുമാമ സ്റ്റേഡിയത്തിൽ നേരിടുമ്പോൾ അൽ ബെയ്ത് സ്റ്റേഡിയത്തിൽ അൽ സദ്ദിന് എതിരാളികളായി ഉംസലാൽ ക്ലബും പോരാടും.
ഇന്ന് ആരംഭിക്കുന്ന പുതിയ സീസണിന് 2024 ഏപ്രിൽ 24ന് ഖത്തർ കപ്പ് ഫൈനലോടെ മത്സരം അവസാനിക്കുമെന്ന് ക്യു.എസ്.എൽ കഴിഞ്ഞ ദിവസം വ്യക്തമാക്കിയിരുന്നു.
ഖത്തറിൽ ജനുവരിയിൽ ആരംഭിക്കുന്ന എ.എഫ്.സി ഏഷ്യൻ കപ്പ് മത്സരത്തിനോടനുബന്ധിച്ച്‌ ക്ലബ് പോരാട്ടങ്ങൾക്ക് ആറാഴ്ചത്തെ ഇടവേളയും ക്യു.എസ്.എൽ പ്രഖ്യാപിച്ചിട്ടുണ്ട്. ഫെബ്രുവരിയിലാണ് എ.എഫ്.സി ഏഷ്യൻ കപ്പ് പോരാട്ടം അവസാനിക്കുന്നത്.
ശക്തമായ തയാറെടുപ്പുകളുമായാണ് ഇത്തവണ ക്ലബുകൾ പോരിനിറങ്ങുന്നത് . ചില കളിക്കാരെ ഒഴിവാക്കിയും പുതിയ കളിക്കാരെ ടീമിലെടുത്തും ക്ലബുകൾ മത്സരത്തിനായി തയ്യാറെടുക്കുകയാണ്. ഓസ്ട്രിയ, തുർക്കിയ, സ്‌പെയിൻ തുടങ്ങിയ രാജ്യങ്ങളിലേക്ക് ടീമുകൾ പരിശീലനത്തിനായി പോയിട്ടുണ്ടായിരുന്നു.
ന്യൂസ്‌റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/DoTp5mITouhJcwHKcDKLsm
