December 05, 2023
December 05, 2023
ദോഹ: ജിസിസി(ഗൾഫ് സഹകരണ കൗൺസിൽ) സുപ്രീം കൗൺസിലിന്റെ 44-ാമത് ഉച്ചകോടിയിൽ പങ്കെടുക്കാൻ ഗൾഫ് രാജ്യങ്ങളിലെ ഭരണാധികാരികൾ ദോഹയിൽ എത്തി. ഹമദ് ഇന്റർനാഷണൽ എയർപോർട്ടിലെ (എച്ച്ഐഎ) അമീരി ടെർമിനലിൽ എത്തിയ നേതാക്കളെ ഖത്തർ അമീർ ശൈഖ് തമീം ബിൻ ഹമദ് അൽതാനിയുടെ നേതൃത്വത്തിലാണ് സ്വീകരിച്ചത്. ഉച്ചകോടിക്ക് ഇന്ന് തുടക്കമാകും.
യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ, ഒമാൻ കാബിനറ്റ് ഉപപ്രധാനമന്ത്രി, കുവൈത്ത് അമീർ ശൈഖ് നവാഫ് അൽ അഹമ്മദ് അൽ ജാബർ അൽ സബാഹ്, കുവൈത്ത് വിദേശകാര്യ മന്ത്രി ശൈഖ് സലീം അബ്ദുല്ല അൽ ജാബർ അൽ സബാഹ്, ബഹ്‌റൈൻ രാജാവ് ഹമദ് ബിൻ ഈസ അൽ ഖലീഫ, സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ ബിൻ അബ്ദുൽ അസീസ് അൽ സൗദ് എന്നിവരെയാണ് ഖത്തർ അമീർ നേരിട്ടെത്തി സ്വീകരിച്ചത്
ഖത്തർ അമീറിന് പുറമെ, ഖത്തർ ഡെപ്യൂട്ടി അമീർ ശൈഖ് അബ്ദുല്ല ബിൻ ഹമദ് അൽതാനി, ശൈഖ് ജാസിം ബിൻ ഹമദ് അൽതാനി, ഖത്തർ ഉപപ്രധാനമന്ത്രിയും പ്രതിരോധ കാര്യ സഹമന്ത്രിയുമായ ഡോ. ഖാലിദ് ബിൻ മുഹമ്മദ് അൽ അത്തിയ, ഖത്തർ ആഭ്യന്തര മന്ത്രിയും ആഭ്യന്തര സുരക്ഷാ സേന (ലെഖ്‌വിയ) കമാൻഡറുമായ ശൈഖ് ഖലീഫ ബിൻ ഹമദ് അൽതാനി, അമീരി ദിവാൻ മേധാവി ശൈഖ് സൗദ് ബിൻ അബ്ദുൽറഹ്മാൻ അൽതാനി, ജിസിസി സെക്രട്ടറി ജനറൽ ജാസിം മുഹമ്മദ് അൽ ബുദൈവി, എന്നിവരും സംഘത്തിലുണ്ടായിരുന്നു. യുഎഇയിലെ ഖത്തർ അംബാസഡർ ഡോ. സുൽത്താൻ സൽമീൻ അൽ മൻസൂരി, ഖത്തറിലെ യു.എ.ഇ അംബാസഡർ ഡോ. സായിദ് ബിൻ ഖലീഫ ബിൻ സുൽത്താൻ ബിൻ ഷഖ്ബൂത് അൽ നഹ്യാൻ, മറ്റ് നിരവധി ഉന്നത ഉദ്യോഗസ്ഥരും നേതാക്കളെ സ്വീകരിക്കാൻ എത്തിയിരുന്നു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
