January 13, 2024
January 13, 2024
ദോഹ: ഗസയിൽ പൊരുതുന്ന ഫലസ്തീൻ ജനതയോടുള്ള ഐക്യദാർഢ്യമായി ഫലസ്തീൻ ടീം ക്യാപ്റ്റൻ മുസാബ് അൽ ബത്താതിനെ ചേർത്തുപിടിച്ചുകൊണ്ട് ഏഷ്യൻ കപ്പ് ഫുട്ബാളിന് ആവേശ്വജ്ജ്വല തുടക്കം. ഇന്നലെ (വെള്ളിയാഴ്ച്ച) ലുസൈൽ സ്റ്റേഡിയത്തിൽ വൈകുന്നേരം അഞ്ചു മണിയോടെയാണ് ഉദ്ഘാടന ചടങ്ങുകൾ ആരംഭിച്ചത്. ഗസയിലെ ഫലസ്തീന് ജനതയ്ക്കായുള്ള പ്രാര്‍ത്ഥനയോടെ ഖത്തർ അമീര്‍ ഷെയ്ഖ് തമീം ബിന്‍ ഹമദ് അല്‍താനി ടൂര്‍ണമെന്റ് ഉദ്ഘാടനം ചെയ്തു.
ടൂർണമെന്റിന്റെ ആതിഥേയ രാജ്യത്തിന്റെ ക്യാപ്റ്റന്മാരാണ് സാധാരണ ഗതിയിൽ മത്സരത്തിന്റെ സത്യപ്രതിജ്ഞ ചെയ്യാറുള്ളത്. ഇതനുസരിച്ച് ഖത്തറിന്റെ ക്യാപ്റ്റൻ ഹസൻ അൽ-ഹെയ്‌ദോസാണ് എ.എഫ്.സി ഏഷ്യൻ കപ്പ് മത്സരത്തിന്റെ സത്യപ്രതിജ്ഞ ചെയ്യേണ്ടിയിരുന്നത്. എന്നാൽ, ഖത്തർ ക്യാപ്റ്റൻ അഭിമാനത്തോടെ സത്യപ്രതിജ്ഞ ചെയ്യാനുള്ള അവസരം ഫലസ്തീൻ ക്യാപ്റ്റൻ മുസാബ് അൽ-ബത്തത്തിന് കൈമാറി. കൂടാതെ, സ്റ്റേഡിയത്തിൽ ചിലർ മുതുകിൽ പലസ്തീൻ പതാകകൾ ധരിച്ചും, ചിലർ ഫലസ്തീൻ പതാകയുടെ നിറങ്ങൾ ധരിച്ചും, മറ്റുള്ളവർ ചെറിയ കടലാസ് പതാകകളുമായും ഫലസ്തീന് ഐക്യദാർഢ്യം പ്രകടിപ്പിച്ചു.
ടൂര്‍ണമെന്റില്‍ പങ്കെടുക്കുന്ന 24 രാജ്യങ്ങളുടേയും സംസ്‌കാരം ഉള്‍ക്കൊണ്ടുള്ള നൃത്താവിഷ്‌കാരവും ചടങ്ങില്‍ നടന്നു. ഒരു മണിക്കൂർ നീണ്ട പരിപാടിയിൽ ‘ദി ലോസ്റ്റ് ചാപ്റ്റർ- കലീല വ ദിംന’ എന്ന അറബ് പഞ്ചതന്ത്ര കഥകളുടെ അവതരണവും ഉണ്ടായിരുന്നു. പാട്ടും ശിൽപങ്ങളും നൃത്തങ്ങളുമായി ഹൃദ്യമായ അവതരണത്തിലൂടെയായിരുന്നു കഥയുടെ ദൃശ്യാവിഷ്കാരം അവതരിപ്പിച്ചത്. കലാപ്രകടനങ്ങളും വെടിക്കൊട്ടും കൊണ്ട് ശ്രദ്ധേയമായ ഉദ്ഘാടന ചടങ്ങ് ഫലസ്തീൻ ദേശീയ ഗാനത്തോടെയായിരുന്നു സമാപനമായത്. ഏഷ്യൻ കപ്പിന്റെ ഔദ്യോഗിക ഗാനമായ ‘ഹദഫ് ഹദഫ്...’ സ്റ്റേഡിയത്തിൽ ആരവം ഉയർത്തി.
