October 09, 2023
October 09, 2023
ന്യൂയോര്‍ക്: ഐക്യരാഷ്ട്രസഭയില്‍ ഇസ്രായേല്‍-ഹമാസ് ആക്രമണത്തില്‍ ഹമാസിനെ മാത്രം കുറ്റപ്പെടുത്താനും ഇസ്രായേലിനെതിരായ ഹമാസിന്റെ ആക്രമണത്തെ മാത്രം അപലപിക്കാനും ശ്രമിച്ച യുഎസിന്റെ ശ്രമം പാളി. രക്ഷാസമിതി അംഗങ്ങള്‍ ഒന്നര മണിക്കൂറിലേറെ ചര്‍ച്ച നടത്തിയിട്ടും ഏകകണ്ഠമായ സംയുക്ത പ്രസ്താവന നടത്താനായില്ല. കൂടാതെ സമാധാനം പുന:സ്ഥാപിക്കാന്‍ ലോകരാജ്യങ്ങള്‍ ഒന്നിക്കണമെന്നും രക്ഷാസമിതി അഭിപ്രായപ്പെട്ടു.
ഇസ്രയേലിനെതിരായ ഹമാസ് ആക്രമണത്തെ ശക്തമായി അപലപിക്കാന്‍ യു.എന്‍ രക്ഷാസമിതിയിലെ 15 അംഗങ്ങളോടും അമേരിക്ക അഭ്യര്‍ത്ഥിച്ചിരുന്നു. ഇസ്രായേലിനെതിരെ ഭീകരാക്രമണമാണ് ഹമാസ് നടത്തുന്നതെന്നും അമേരിക്ക ഊന്നി പറഞ്ഞു. എന്നാല്‍, അമേരിക്കയുടെ ആവശ്യത്തോട് എല്ലാ അംഗങ്ങളും അനുകൂലമായി പ്രതികരിച്ചില്ല.
'ഹമാസ് ആക്രമണത്തെ വലിയ വിഭാഗം അംഗങ്ങളും അപലപിച്ചിട്ടുണ്ട്. എന്നാല്‍, എല്ലാവരും ഇല്ല' എന്ന് മുതിര്‍ന്ന യു.എസ് നയതന്ത്രജ്ഞന്‍ റോബര്‍ട്ട് വൂഡ് യോഗത്തിന് ശേഷം പറഞ്ഞു.
എല്ലാ അംഗങ്ങളുടെയും പിന്തുണയുണ്ടെങ്കില്‍ മാത്രമേ രക്ഷാസമിതിയില്‍ സംയുക്ത പ്രസ്താവന നടത്താനാകൂ. നിലവിലെ സംഘര്‍ഷ സാഹചര്യത്തിന് ഹമാസിനെ മാത്രം കുറ്റപ്പെടുത്തുന്നതിലുപരി പ്രശ്‌നപരിഹാരത്തിന് വിശാലമായ മാര്‍ഗം തേടുകയാണ് വേണ്ടതെന്നും രക്ഷാസമിതി അംഗങ്ങള്‍ വ്യക്തമാക്കി.
അതേസമയം, ഒന്നര മണിക്കൂറിലേറെ നീണ്ട യോഗത്തില്‍ യു.എന്‍ മിഡില്‍ ഈസ്റ്റ് സമാധാന അംബാസഡര്‍ ടോര്‍ വിന്നിസ്ലാന്‍ഡ് നിലവിലെ സാഹചര്യം വിശദീകരിച്ചു. യു.എന്‍ സെക്രട്ടറി ജനറല്‍ അന്റോണിയോ ഗുട്ടെറസ് സംഘര്‍ഷത്തെ അപലപിച്ചു. വ്യാപകമായ സംഘര്‍ഷം ഒഴിവാക്കാന്‍ എല്ലാ നയതന്ത്ര ശ്രമങ്ങളും നടത്തണമെന്നും യു.എന്‍ വക്താവ് സ്റ്റെഫാന്‍ ഡുജാറിക് ഔദ്യോഗിക പ്രസ്താവനയില്‍ പറഞ്ഞു.
ന്യൂസ്റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/FSQLmJGMow51SCIIBEEcWV
