October 05, 2023
October 05, 2023
ദോഹ: ഖത്തര്‍ ആതിഥേയത്വം വഹിക്കുന്ന എഎഫ്സി ഏഷ്യന്‍ കപ്പ് ഫുട്ബോള്‍ മത്സരത്തിന്റെ വോളന്റിയര്‍ രജിസ്ട്രേഷന് ആരംഭിച്ചു. ലുസൈല്‍ സ്റ്റേഡിയത്തില്‍ ആരംഭിച്ച വോളന്റിയര്‍ പ്രോഗ്രാമില്‍ ഇരുപത് പ്രവര്‍ത്തന മേഖലകളിലായി ഏകദേശം 6,000 വോളന്റിയര്‍മാരെ റിക്രൂട്ട് ചെയ്യുമെന്ന് എഎഫ്സി ഏഷ്യന്‍ കപ്പ് സംഘാടക സമിതി അറിയിച്ചു.
ഖത്തര്‍ പൗരന്മാര്‍ക്കും ഖത്തറിലെ താമസക്കാര്‍ക്കും വോളന്റിയറാകാന്‍ അപേക്ഷ നല്‍കാം. അപേക്ഷകര്‍ക്ക് 18 വയസ്സ് പൂര്‍ത്തിയായിരിക്കണം. അപേക്ഷകരില്‍ നിന്നും ഷോര്‍ട്ട്ലിസ്റ്റ് ചെയ്യുന്നവരെ നേരിട്ടുള്ള ഗ്രൂപ്പ് അഭിമുഖങ്ങള്‍ക്കായി ബന്ധപ്പെടും. തിരഞ്ഞെടുക്കപ്പെടുന്നവര്‍ക്ക് വോളന്റിയര്‍ പരിശീലനവുമുണ്ടാകും. ടിക്കറ്റിംഗ്, അക്രഡിറ്റേഷന്‍, മാധ്യമ സേവനങ്ങള്‍, സന്ദര്‍ശക സേവനങ്ങള്‍ എന്നിവയുള്‍പ്പെടുന്നതാണ് വോളന്റിയര്‍മാരുടെ ജോലികള്‍.
2024 ജനുവരി 12 മുതല്‍ ഫെബ്രുവരി 10 വരെയാണ് എഷ്യന്‍ കപ്പ് മത്സരങ്ങള്‍ നടക്കുക. ഇന്ത്യ ഉള്‍പ്പെടെയുള്ള ഏഷ്യന്‍ രാജ്യങ്ങളില്‍ നിന്നുള്ള 24 ടീമുകള്‍ ടൂര്‍ണമെന്റില്‍ പങ്കെടുക്കും. ഏഴ് ലോകകപ്പ് വേദികളില്‍ ഉള്‍പ്പെടെ ഒന്‍പത് സ്റ്റേഡിയങ്ങളിലായി 51 മത്സരങ്ങളാണ് നടക്കുക. അതേസമയം മത്സരത്തിന്റെ ടിക്കറ്റ് വില്‍പ്പന സംബന്ധിച്ച വിവരങ്ങള്‍ ഉടന്‍ പ്രഖ്യാപിക്കുമെന്നാണ് റിപ്പോര്‍ട്ടുകള്‍. ഇത് മൂന്നാം തവണയാണ് ഖത്തര്‍ എഎഫ്സി ഏഷ്യന്‍ കപ്പിന് വേദിയാകുന്നത്.
വോളന്റിയര്‍ രജിസ്ട്രേഷന് ലിങ്ക് : https://volunteer.asiancup2023.qa/register
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/FSQLmJGMow51SCIIBEEcWV
