March 19, 2024
March 19, 2024
ദോഹ: ഫിഫ ലോകകപ്പ് 2026, എഎഫ്സി ഏഷ്യൻ കപ്പ് 2027 എന്നീ യോഗ്യതാ ത്സരങ്ങൾക്കുള്ള ഖത്തർ ടീമിനെ പ്രഖ്യാപിച്ചു. ഖത്തർ ദേശീയ ഫുട്ബോൾ ടീം പരിശീലകൻ മാർക്വിസ് ലോപ്പസാണ് ടീമിനെ പ്രഖ്യാപിച്ചത്. രണ്ട് യോഗ്യതാ മത്സരങ്ങളിലും കുവൈത്താണ് ഖത്തറിന്റെ എതിരാളികൾ. മാർച്ച് 21, 26 തീയതികളിൽ ദോഹയിലും കുവൈത്തിലുമാണ് മത്സരങ്ങൾ നടക്കുക. മാർച്ച് 21ന് രാത്രി 9:30ന് ജാസിം ബിൻ ഹമദ് സ്റ്റേഡിയത്തിലാണ് ഖത്തറിന്റെ ആദ്യ മത്സരം.
യോഗ്യത മത്സരത്തിന്റെ ടിക്കറ്റ് വിൽപന ആരംഭിച്ചതായി ഖത്തർ ഫുട്ബോൾ അസോസിയേഷൻ (ക്യു.എഫ്.എ) സോഷ്യൽ മീഡിയ അക്കൗണ്ടുകളിലൂടെ അറിയിച്ചു. tickets.hayya.qa എന്ന ലിങ്ക് വഴി മാച്ച് ടിക്കറ്റുകൾ ബുക്ക് ചെയ്യാവുന്നതാണ്. ഹയ്യാ ആപ് വഴിയും ടിക്കറ്റുകൾ വാങ്ങാം. പത്ത് റിയാൽ മുതലാണ് ടിക്കറ്റ് നിരക്ക്. രണ്ടാം റൗണ്ടിലെ മൂന്നാം മത്സരത്തിനാണ് ഖത്തറും കുവൈത്തും മത്സരിക്കുന്നത്.
നേരത്തേ നടന്ന മത്സരത്തിൽ ഖത്തർ അഫ്ഗാനിസ്താനെയും (8-1), ഇന്ത്യയെയും (3-0) തോൽപിച്ചിരുന്നു. കുവൈത്തിന്റെ ആദ്യ മത്സരത്തിൽ ഇന്ത്യയെ 1-0 എന്ന സ്കോറിനും രണ്ടാം അങ്കത്തിൽ അഫ്ഗാനിസ്താനെ 4-0 എന്ന സ്കോറിനും തോൽപിച്ചിരുന്നു.
ഖത്തർ സ്ക്വാഡ്:
ഗോൾകീപ്പർമാർ: മിഷാൽ ബർഷാം (അൽ സദ്ദ്), സലാഹ് സക്കറിയ (അൽ ദുഹൈൽ), സൗദ് അൽ ഖാതർ (അൽ വക്ര)
ഡിഫൻഡർമാർ: മഹ്ദി സലേം ലൂക്കാസ് മെൻഡസ് (അൽ വക്ര), താരിഖ് സൽമാൻ (അൽ സദ്ദ്), ഹൊമാം അൽ അമിൻ (അൽ ഗരാഫ), ബസ്സാം അൽ റാവി (അൽ റയ്യാൻ), സുൽത്താൻ അൽ ബ്രേക്ക് (അൽ ദുഹൈൽ), മുഹമ്മദ് അയ്യാഷ് (അൽ അഹ്‌ലി)
മിഡ്ഫീൽഡർമാർ: അഹമ്മദ് ഫാത്തി (അൽ അറബി), ജാസെം ജാബർ (അൽ അറബി), അബ്ദുല്ല അൽ മറാഫി (അൽ അറബി), അബ്ദുൽ അസീസ് ഹാതിം (അൽ റയ്യാൻ), മുഹമ്മദ് വാദ് (അൽ സദ്ദ്), മുസ്തഫ മെഷാൽ (അൽ സദ്ദ്), മഹ്ദി സലേം അൽ മുഅജ്ബ (അൽ ഷമാൽ), അബ്ദുല്ല അബ്ദുൽസലാം അൽ അഹ്റക് (ഖത്തർ എസ്‌സി)
ഫോർവേഡുകൾ: അഹമ്മദ് അൽ ജാൻഹി (അൽ ഗരാഫ), അഹമ്മദ് അല (അൽ ഗരാഫ), അക്രം അഫീഫ് (അൽ സദ്ദ്), യൂസഫ് അബ്ദുൾറസാഖ് (അൽ സദ്ദ്), അൽമോസ് അലി (അൽ ദുഹൈൽ), അഹമ്മദ് അൽ റാവി (അൽ റയ്യാൻ), ഇസ്മായിൽ മുഹമ്മദ് (അൽ ദുഹൈൽ)
അതേസമയം, നിരവധി വർഷത്തെ മികച്ച കരിയറിന് ശേഷം അന്താരാഷ്ട്ര മത്സരങ്ങളിൽ നിന്ന് വിരമിക്കൽ പ്രഖ്യാപിച്ച മുൻ ദേശീയ ടീം ക്യാപ്റ്റൻ ഹസൻ അൽ ഹെയ്‌ദോസിനെ ഖത്തർ ടീമിന് നഷ്ടമാകും. അല്‍ അന്നാബിയോടൊപ്പമുള്ള തന്റെ കരിയറില്‍, 183 അന്താരാഷ്ട്ര മത്സരങ്ങളിൽ 41 ഗോളുകളാണ് ഹസൻ നേടിയത്. 2014 ലെ ഗള്‍ഫ് കപ്പും 2019 ലും 2023 ലും നടന്ന എഎഫ്സി ഏഷ്യന്‍ കപ്പും നേടിയ ഖത്തര്‍ ഫുട്ബോള്‍ ദേശീയ ടീമിന്റെ ചരിത്ര നായകന്മാരില്‍ ഒരാളായിരുന്നു ഹസൻ.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
