October 31, 2022
October 31, 2022
അൻവർ പാലേരി
ദോഹ :ഖത്തർ ലോകകപ്പിന് ദിവസങ്ങൾ മാത്രം ശേഷിക്കെ മലപ്പുറത്തിന്റെ ഫുട്‍ബോൾ പെരുമയും നാട്ടിൻപുറത്തെ കളിയാവേശവും അഭ്രപാളിയിലാക്കി നടൻ മോഹൻലാൽ.ഖത്തർ ലോകകപ്പിന് ഐക്യദാർഢ്യം അറിയിച്ചുകൊണ്ട് മോഹൻലാൽ ഒരുക്കിയ 'മോഹൻലാൽസ് സല്യൂട്ടേഷൻസ് റ്റു ഖത്തർ' സംഗീത ദൃശ്യാവിഷ്‌കാരം ഞായറാഴ്ച ദോഹയിലെ ഗ്രാൻ ഹയാത്ത് ഹോട്ടലിൽ നടന്ന ചടങ്ങിൽ പുറത്തിറക്കി.
ടി.കെ രാജീവ്‌കുമാറാണ് നാല് മിനുട്ട് ദൈർഘ്യമുള്ള ആൽബം പറത്തിറക്കിയത്.ശബ്ദം നൽകിയതും ഗാനം ആലപിച്ചതും മോഹൻലാൽ തന്നെ.പൂർണമായും മലപ്പുറത്ത് ചിത്രീകരിച്ച ആൽബത്തിൽ ഇന്ത്യയിലെ ഒരു ചെറിയ പ്രദേശത്തെ ജനജീവിതവുമായി ഫുട്‍ബോൾ എങ്ങനെ ഇണങ്ങിക്കിച്ചേർന്നിരിക്കുന്നുവെന്ന ജീവസ്സുറ്റ ചിത്രങ്ങളാണ് പരിചയപ്പെടുത്തുന്നത്.മലപ്പുറത്തെ കൊച്ചുകുട്ടികൾ മുതൽ സ്ത്രീകളും കുട്ടികളും വയോധികരും വരെ എങ്ങനെ ഫുട്‍ബോളിന്റെ ഭാഗമാവുന്നുവെന്ന ഗ്രാമീണ ചിത്രങ്ങളാണ് ആൽബത്തിൽ പകർത്തിയത്. യൂട്യൂബിൽ റിലീസ് ചെയ്ത ആൽബം 13 മണിക്കൂറിനകം നാല് ലക്ഷത്തിലധികം പേരാണ് കണ്ടത്.
ഹിഷാം അബ്ദുൽവഹാബ് ആണ് ഈണം പകർന്നത്.ഛായാഗ്രഹണം സുധീപ് ഇളമൺ.ആന്റണി പെരുമ്പാവൂർ നിർമിച്ച് ആശിർവാദ് സിനിമാസ് പുറത്തിറക്കിയ ഗാനത്തിൽ മലപ്പുറത്തെ പ്രശസ്ത ഫുട്‍ബോൾ താരങ്ങൾ മുതൽ കൊച്ചുകുട്ടികൾ വരെ മോഹൻലാലിനൊപ്പം അഭിനയിച്ചിട്ടുണ്ട്.
ഇന്ത്യൻ എംബസിയുടെ അപ്പെക്‌സ് ബോഡിയായ ഇന്ത്യൻ സ്പോർട്സ് സെന്ററും ഒലീവ് സുനോ റേഡിയോ നെറ്റ്‌വർക്കും സംയുക്തമായാണ് പരിപാടി സംഘടിപ്പിച്ചത്.ചടങ്ങിൽ മോഹൻലാൽ,ടി.കെ രാജീവ്കുമാർ,റേഡിയോ സുനോ ഡയറക്റ്റർ കൃഷ്ണദാസ്,മിബു ജോസ് തുടങ്ങിയവർ സംസാരിച്ചു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/EbsrZk47eaBENKOhwtWeGf എന്ന ലിങ്കിൽ ജോയിൻ ചെയ്യുക
