October 16, 2022
October 16, 2022
ന്യൂസ്‌റൂം ബ്യുറോ
ദോഹ :കോൺഗ്രസ് ദേശീയ അധ്യക്ഷ സ്ഥാനത്തേക്ക് മത്സരിക്കുന്ന ശശി തരൂരിനെ വിജയിപ്പികാനായി കേരളത്തിലെ കോൺഗ്രസ് നേതാക്കൾ ഒറ്റക്കെട്ടായി പ്രവർത്തിക്കണമെന്ന് ഖത്തർ ഇൻകാസ് മുൻ പ്രസിഡന്റും ഒഐസിസി ഗ്ലോബല്‍ കമ്മിറ്റി മുൻ ജനറൽ സെക്രട്ടറിയുമായ ജോപ്പച്ചൻ തെക്കേക്കൂറ്റ്.
'ശശി തരുരിനെ പോലെ ലോകം അറിയുന്ന നേതാക്കള്‍ കോണ്‍ഗ്രസ്സ് പ്രസിഡണ്ട് സ്ഥാനത്തേക്ക് മത്സരിക്കുമ്പോള്‍ ആ സ്ഥാനാര്‍ത്ഥിത്വം നമ്മുടെ അഭിമാനമായി കണ്ടുകൊണ്ട് അദ്ധേഹത്തിന്‍റെ വിജയത്തിനായി പ്രവര്‍ത്തിക്കുവാന്‍ കേരളത്തിലെ കോണ്‍ഗ്രസ്സ് നേതാക്കള്‍ തയ്യാറാവേണ്ടതായിരുന്നു. തെരെഞ്ഞെടുപ്പിന് മണിക്കൂറുകള്‍ മാത്രം അവശേഷിക്കെ, മറ്റെല്ലാ താല്പര്യങ്ങളും പരിഗണനകളും മാറ്റിവെച്ചു കൊണ്ട് ശശി തരൂരിന് വോട്ട് ചെയ്യുവാനും അദ്ധേഹത്തെ വിജയിപ്പിക്കുവാനും തയ്യാറകണമെന്ന് വളരെ വിനയപൂര്‍വ്വം അഭ്യര്‍ത്ഥിക്കുന്നു.'അദ്ദേഹം പ്രസ്താവനയിൽ ആവശ്യപ്പെട്ടു.
കോണ്‍ഗ്രസ്സിന്‍റെ ഉയര്‍ത്തെഴുന്നേൽപ് വളരെ അനിവാര്യമായ ഒരു കാലഘട്ടത്തിലാണ് നമ്മള്‍ ജീവിക്കുന്നത്. ആര്‍ഷഭാരത സംസ്കാരത്തിന്‍റെ മാഹാത്മ്യം ഉള്‍ക്കൊള്ളുന്ന ഇന്ത്യൻ ജനത സംസ്കാര ശുന്യമായ വിഭാഗീയതയിലേക്ക് പോകുന്നത് ഭീതിപ്പെടുത്തുന്ന കാര്യമാണെന്നും അദ്ദേഹം കൂട്ടിച്ചേർത്തു.
പ്രസ്ഥാനത്തിന് നവജീവന്‍ കൈവരിക്കണമെങ്കില്‍ അടിമുടി മാറ്റം വരണമെന്നും കഴിവും പ്രാപ്തിയും ഉള്ള നേതാക്കള്‍ പാര്‍ട്ടിയുടെ ഉന്നത സ്ഥാനങ്ങളിലേക്ക് വരണമെന്നും പ്രസംഗിക്കുന്ന നേതാക്കള്‍ യാതൊരു ആശങ്കക്കും ഇടവരാത്ത രീതിയില്‍ ഈയൊരു സാഹചര്യത്തല്‍ നിലപാട് എടുക്കേണ്ടതുണ്ട്. വിദേശ രാജ്യങ്ങളില്‍ കോണ്‍ഗ്രസ്സ് സംസ്കാരവും ആദര്‍ശവും ഉള്‍ക്കൊണ്ട് കഴിയുന്ന പതിനായിരക്കണക്കിന് പ്രവാസികളുടെ ആഗ്രഹവും ഇതു തന്നെയാണെന്ന് നേതാക്കള്‍ മനസ്സിലാക്കണമെന്നും അദ്ദേഹം പറഞ്ഞു.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/KYKm2u8nQZBBNg2J0Y6mez എന്ന ലിങ്കിൽ ജോയിൻ ചെയ്യുക
