September 15, 2021
September 15, 2021
ദോഹ : ഗൾഫ് കറൻസികളുമായുള്ള ഇന്ത്യ, പാക്കിസ്ഥാൻ രാജ്യങ്ങളുടെ രൂപയുടെ മൂല്യം ഗൂഗിൾ കുത്തനെ കൂട്ടിയതിനെ തുടർന്ന് വിവിധ ഗൾഫ് രാജ്യങ്ങളിലെ മണി എക്സ്ചേഞ്ചുകളിൽ ടെലിഫോൺ പ്രവാഹം. ഇന്ന് ഉച്ചയോടെയാണ് ഗൂഗിളിൽ യുഎഇ ദിർഹത്തിനെതിരെ ഇന്ത്യൻ രൂപയുടെ മൂല്യം വർധിപ്പിച്ചത്. ഒരു ഖത്തർ റിയാലിന് 21.46 രൂപ കാണിച്ചപ്പോൾ യു.എ.ഇ ദിര്ഹത്തിന്റെ നിരക്ക് 24.73 രൂപയെന്നാണ് കാണിച്ചത്. പാക്കിസ്ഥാൻ രൂപയാണെങ്കിൽ 51 യും. യുഎഇ സമയം വൈകിട്ട് 3.45 വരെ ഈ തെറ്റ് തിരുത്തിയിട്ടില്ല. യഥാർഥത്തിൽ ഇന്ന് വിവിധ മണി എക്സ്ചേഞ്ചുകളിലെ ഖത്തർ റിയാലിന്റെ വിനിമയ നിരക്ക് 20 രൂപ 02 പൈസയാണ്. ഒരു ദിർഹത്തിന് 19.90 രൂപയാണ്. പാക്കിസ്ഥാൻ രൂപ 45.95 രൂപയും. മൂല്യം റോക്കറ്റ് പോലെ ഉയർന്നത് കണ്ട് മലയാളികളടക്കമുള്ളവർ പരിഭ്രാന്തരായി. പലരും ഉടൻ തന്നെ തങ്ങളുടെ പണം അയക്കാനായി ബാങ്കുകളുടെ ആപ്ലിക്കേഷൻ തുറന്നപ്പോഴാണ് മനസിലായത് ‘ഗൂഗിൾ’ ചതിച്ചതാണെന്ന്. ബാങ്കിൽ പരിശോധന നടത്താതെ ചിലർ ആവേശം കൊണ്ടതോടെ വിവിധ മണി എക്സ്ചേഞ്ചുകളുടെയും മാധ്യമ സ്ഥാപനങ്ങളുടെയും ടെലിഫോണിനും വിശ്രമമില്ലാതായി. മൂല്യം വർധിച്ചത് ശരിയാണോ എന്നല്ല, എക്സ്ചേഞ്ചിൽ കാര്യമായ തിരക്കുണ്ടോ എന്നായിരുന്നു പലർക്കും അറിയേണ്ടിയിരുന്നത്.
