August 05, 2022
August 05, 2022
ദോഹ : പതിനെട്ട് വയസ് വരെ പ്രായമുള്ള കുട്ടികൾക്കായി ഇന്ത്യൻ സ്പോർട്സ് സെന്ററും മഞ്ഞപ്പട ഖത്തറും ചേർന്നൊരുക്കുന്ന "എ വൺ എൻജിനീയറിങ് - യങ് കൊമ്പൻസ്" സൗജന്യ സമ്മർ ഫുട്‌ബോൾ ക്യാമ്പിന് ബിർള പബ്ലിക് സ്കൂൾ ഗ്രൗണ്ടിൽ തുടക്കമായി.
75മത് ഇന്ത്യൻ സ്വാതന്ത്ര്യ ദിനാഘോഷത്തിന്റെ ഭാഗമായി സംഘടിപ്പിക്കുന്ന ഫുട്‌ബോൾ പരിശീലനം ഇന്ത്യൻ സ്പോർട്സ് സെന്റർ ജനറൽ സെക്രട്ടറി ശ്രീനിവാസ് ഉദ്ഘാടനം ചെയ്തു.
കുട്ടികളിലെ കായികക്ഷമത വർധിപ്പിക്കാൻ ഉതകുന്ന ഇത്തരം ഒരു പദ്ധതിയുമായി മുന്നോട്ടു വന്ന മഞ്ഞപട ഖത്തറിനെ അദ്ദേഹം അഭിനന്ദിച്ചു.
കുട്ടികൾക്കുള്ള സൗജന്യ ജേഴ്‌സി വിതരണം മഞ്ഞപട ഖത്തർ പ്രസിഡന്റ് ദീപേഷ് ഗോവിന്ദൻകുട്ടിയും സെക്രട്ടറി അഖിൽ നൂറുദീനും ചേർന്ന് നിർവഹിച്ചു.
വേനലവധിക്കാലത്ത് കുട്ടികൾക്ക് ഫുട്‌ബോളിനോടുള്ള താൽപ്പര്യം പരിപോഷിപ്പിക്കുന്നതിനോടൊപ്പം കുട്ടികളിലെ ഒളിഞ്ഞിരിക്കുന്ന കായികക്ഷമത കണ്ടെത്തുക കൂടിയാണ് ക്യാമ്പിന്റെ ലക്ഷ്യമെന്ന് അദ്ദേഹം പറഞ്ഞു.
8 വയസ്സ് മുതൽ 18 വയസ്സ് വരെയുള്ള 150ൽ പരം കുട്ടികൾക്ക് പ്രായം അടിസ്ഥാനപ്പെടുത്തി വിവിധ ബാച്ചുകളിലായിട്ടാണ് പരിശീലനം. ഒരു മാസം നീണ്ടു നിൽക്കുന്ന ക്യാമ്പ് വൈകിട്ട് 6 മുതൽ 9 വരെ ബിർള പബ്ലിക് സ്കൂൾ, ഒലീവ് ഇന്റർനാഷണൽ സ്കൂൾ എന്നിവിടങ്ങളിലായാണ് നടക്കുന്നത്.
സന്തോഷ് ട്രോഫി നേടിയ കേരള ഫുട്‌ബോൾ ടീമിന്റെ കോച്ച് ബിനോ ജോർജ്ന്റെ മേൽനോട്ടത്തിലാണ് പരിശീലനം. എ. എഫ്.സി കോച്ചിങ് ലൈസൻസ് ഉള്ള, അണ്ടർ 15 ഗോകുലം എഫ് സി യുടെ മുൻ കോച്ച്.സുനീഷ് ശിവൻ ആണ് മുഖ്യപരിശീലകൻ.സുവിത്ത് വാഴപുള്ളി ആണ് സഹപരിശീലകൻ.
ഇന്റഗ്രേറ്റഡ് ഇന്ത്യൻ കമ്യൂണിറ്റി സെന്ററിലെ കഞ്ചാനി ഹാളിൽ നടന്ന ചടങ്ങിൽ ഐ.എം.വിജയൻ ആണ് ക്യാമ്പിന്റെ ലോഞ്ചിങ്ങും ലോഗോ പ്രകാശനവും നടത്തിയത്.
ന്യൂസ്‌റൂം വാർത്തകൾ മുടങ്ങാതെ ലഭിക്കാനും പരസ്യങ്ങൾ നൽകാനും ബന്ധപ്പെടുക : +974 33450597
