July 22, 2020
July 22, 2020
ദോഹ : കോവിഡ് വ്യാപനം കുറവുള്ള രാജ്യങ്ങളിലുള്ള ഖത്തറിൽ താമസവിസയുള്ളവർക്ക് ആഗസ്റ്റ് ഒന്ന് മുതൽ രാജ്യത്തേക്ക് തിരിച്ചുവരാൻ അനുമതി നൽകിയതായി ഗവണ്മെന്റ് കമ്യുണിക്കേഷൻ ഓഫീസിനെ ഉദ്ധരിച്ച് പ്രാദേശിക മാധ്യമങ്ങൾ റിപ്പോർട്ട് ചെയ്തു. ഓരോ രാജ്യത്തെയും കോവിഡ് വ്യാപനത്തിന്റെ തോത് അനുസരിച്ചായിരിക്കും രാജ്യത്തേക്ക് പ്രവേശനം അനുവദിക്കുക. ഇതിന്റെ ഭാഗമായി കോവിഡ് അപകട സാധ്യത കുറഞ്ഞ രാജ്യങ്ങളുടെ ആദ്യഘട്ട പട്ടിക ആരോഗ്യ മന്ത്രാലയം പുറത്തുവിട്ടു. നാൽപതോളം രാജ്യങ്ങളാണ് ആദ്യഘട്ട പട്ടികയിൽ ഉള്ളത്.ഈ പട്ടികയിൽ ഉൾപെട്ട രാജ്യങ്ങളിൽ നിന്നുള്ള പൗരന്മാർക്കാണ് ആഗസ്റ്റ് ഒന്ന് മുതൽ ഖത്തറിലേക്ക് തിരിച്ചുവരാൻ അനുമതിയുള്ളത്. എന്നാൽ ഇന്ത്യ,പാക്കിസ്ഥാൻ,ശ്രീലങ്ക,നേപ്പാൾ,ബംഗ്ലാദേശ് ഉൾപ്പെടെയുള്ള രാജ്യങ്ങൾ പട്ടികയിൽ ഉൾപെട്ടിട്ടില്ല.കോവിഡ് വ്യാപനം കുറഞ്ഞ രാജ്യങ്ങളുടെ പട്ടിക പൊതുജനാരോഗ്യ മന്ത്രാലയത്തിന്റെ വെബ്സൈറ്റിൽ പ്രസിദ്ധീകരിച്ചിട്ടുണ്ട്.(പട്ടിക കാണാം)
എല്ലാ രണ്ടാഴ്ച കൂടുമ്പോഴും പട്ടികയിൽ ഭേദഗതി വരുത്തുമെന്നും ആരോഗ്യമന്ത്രാലയം അറിയിച്ചിട്ടുണ്ട്.ഈ രാജ്യങ്ങളിലെ അംഗീകൃത ലാബുകളിൽ കോവിഡ് പരിശോധന നടത്തിയതിന്റെ കോവിഡ് മുക്ത സർട്ടിഫിക്കറ്റ് ഉള്ളവർക്കാണ് ഖത്തറിലേക്ക് പ്രവേശനം അനുവദിക്കുക.യാത്ര പുറപ്പെടുന്നതിന് 48 മണിക്കൂർ മുമ്പുള്ള കോവിഡ് രഹിത സർട്ടിഫിക്കറ്റാണ് ഹാജരാക്കേണ്ടത്.
അതേസമയം,അതിതീവ്ര കോവിഡ് വ്യാപനം തുടരുന്ന ഇന്ത്യ എപ്പോൾ പട്ടികയിൽ ഇടം പിടിക്കുമെന്ന കാര്യത്തിൽ ആശങ്ക തുടരുകയാണ്.ഇന്ത്യയിൽ ശരാശരി നാൽപതിനായിരം പേർക്കാണ് നിലവിൽ ഓരോ ദിവസവും കോവിഡ് സ്ഥിരീകരിക്കുന്നത്.ഇതിൽ ഗണ്യമായ കുറവുണ്ടാകുന്ന മുറക്കായിരിക്കും ഇന്ത്യ പട്ടികയിൽ ഇടം പിടിക്കുക.മലയാളികൾ ഉൾപെടെ ആയിരക്കണക്കിന് ഇന്ത്യക്കാരാണ് ഖത്തറിലേക്ക് തിരിച്ചുവരാൻ കഴിയാതെ നാട്ടിൽ കുടുങ്ങിക്കിടക്കുന്നത്.
ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക