December 03, 2021
December 03, 2021
ദോഹ : പ്രമുഖ ടാക്സി കാർ സംരംഭകരായ യൂബറിനെതിരെ പരാതികളുമായി ഉപഭോക്താക്കൾ. യാത്രക്കായി ബുക്ക് ചെയ്ത ട്രിപ്പുകൾ സ്വമേധയാ ക്യാൻസൽ ആവുകയും, ഇതിന് പണം ഈടാക്കുകയും ചെയ്യുന്നതായാണ് പരാതി ഉയർന്നത്. സമൂഹമാധ്യമങ്ങളിലൂടെ നിരവധി പേരാണ് ഇത്തരം അനുഭവങ്ങൾ തെളിവുകൾ അടക്കം നിരത്തിയത്.ട്രിപ്പ് സ്വയം കാൻസലാക്കിയ ശേഷം അഞ്ച് റിയാലാണ് ഇതിനായി ഈടാക്കുന്നത്.ഇക്കാര്യം അറിയിച്ചു കൊണ്ട് ഇ മെയിൽ ഉൾപ്പെടെയുള്ള സന്ദേശങ്ങൾ യാത്രക്കാരന് ലഭിക്കും. അടുത്ത ട്രിപ്പിൽ ഈ നിരക്ക് കൂടി ഉൾപ്പെടുത്തിക്കൊണ്ടുള്ള തുക യാത്രക്കാരൻ അടക്കേണ്ടി വരും.
'റയ്യാൻ ലുലു സെന്ററിൽ നിന്നും ഞാൻ യൂബർ ബുക്ക് ചെയ്തു. ഇമെയിൽ ഐഡിയോ ഡ്രൈവറുടെ നമ്പറോ എനിക്ക് ലഭിച്ചില്ല, വാഹനം വന്നതുമില്ല. എന്നാൽ, ഏറെ വൈകാതെ അഞ്ച് റിയാൽ എന്നിൽ നിന്നും ഈടാക്കിയതായി യൂബറിൽ നിന്നും സന്ദേശമെത്തി.' യൂബറിന് ഒരു സ്റ്റാർ റേറ്റിംഗ് നൽകിയ ഒരു ഉപഭോക്താവ് തന്റെ അനുഭവം വിവരിച്ചു. യൂബറിനെ ബന്ധപ്പെട്ടത് ഇക്കാര്യത്തിൽ വിശദീകരണം തേടാൻ ശ്രമിച്ചിട്ട് സാധിക്കുന്നില്ല എന്നും ഉപഭോക്താക്കൾ ആരോപിച്ചു. തങ്ങൾക്കായുള്ള വാഹനം വന്ന് ചേരുമെന്ന പ്രതീതി ഉണ്ടാക്കിയ ശേഷം യാത്ര ക്യാൻസൽ ആവുന്നത് നിത്യസംഭവമായി മാറിയിട്ടുണ്ട് എന്നാണ് ഉപഭോക്താക്കളുടെ പരാതി. ഇത് കാരണം ഇന്റർവ്യൂ, ആശുപത്രി സേവനങ്ങൾ എന്നിവ വൈകിയ ആളുകളും നിരവധിയാണ്. യാത്രയ്ക്കായി വാഹനം ബുക്ക് ചെയ്യുന്നവർ മാസ്ക് ധരിക്കാത്തതിനാലാണ് ബുക്കിംഗ് ക്യാൻസൽ ചെയ്തതെന്ന് ഒരുകൂട്ടം യൂബർ ഡ്രൈവർമാർ അവകാശവാദം ഉന്നയിച്ചിട്ടുണ്ടെങ്കിലും, കമ്പനി ഇതുവരെ ഇക്കാര്യത്തിൽ ഔദ്യോഗികമായി പ്രതികരിച്ചിട്ടില്ല. ഈ രംഗത്ത് യൂബറിന് എതിരാളികൾ ഇല്ലാത്തതിനാലാണ് ഈ അലസതയെന്നും, മറ്റൊരു ബദൽ കമ്പനി വേണ്ടതുണ്ടെന്നുമായിരുന്നു ചില ഉപഭോക്താക്കളുടെ അഭിപ്രായം.
ന്യൂസ്‌റൂം വാർത്തകൾ ലഭിക്കാൻ ഈ ലിങ്കിൽ(https://www.facebook.com/groups/Newsroomclub) ക്ലിക്ക് ചെയ്ത് ന്യൂസ്‌റൂം എഫ്.ബി പേജിൽ അംഗമാവുക.വാട്സ്ആപ്പിൽ വാർത്തകൾ ലഭിക്കാൻ 00974 33450597 വാട്സ്ആപ് നമ്പറിൽ സന്ദേശമയക്കുക
