June 24, 2020
June 24, 2020
ദോഹ : കോവിഡ് വ്യാപനത്തെ തുടർന്ന് വാണിജ്യ-വ്യാവസായിക മേഖല വലിയ തിരിച്ചടി നേരിടുമ്പോഴും അപൂർവം ചില മേഖലകളിൽ ബിസിനസ് വലിയ രീതിയിൽ വളർച്ച കൈവരിക്കുകയാണ്.ഇതിലൊന്നാണ് ഐ.ടി മേഖല. ക്ലൗഡ് ടെക്നോളജിയുടെ അനന്ത സാധ്യതകള്‍ ബിസിനസ് മേഖലയിലുണ്ടാക്കിയ വൻ മുന്നേറ്റത്തിന് ഗൾഫ് രാജ്യങ്ങളിൽ ചുക്കാൻ പിടിക്കുന്ന ദോഹയിലെ അസീം ടെക്നോളജിയുടെ സി.ഇ.ഒ ആലപ്പുഴ സ്വദേശി ഷഫീഖ് കബീർ ഇക്കാര്യം തുറന്നു സമ്മതിക്കുന്നു. കോവിഡ് പ്രതിസന്ധി ബിസിനസ് രംഗത്തുണ്ടാക്കിയ മാന്ദ്യം തങ്ങളെ ബാധിച്ചിട്ടില്ലെന്നും ബിസിനസ് ഇരട്ടിയിലധികം വർധിക്കുകയാണുണ്ടായതെന്നും അദ്ദേഹം ന്യൂസ്‌റൂമിനോട് പറഞ്ഞു. പല മേഖലകളിലും ജീവനക്കാർക്ക് വൻ തോതിൽ തൊഴിൽ നഷ്ടമാകുമ്പോഴും ഏറ്റെടുത്ത പദ്ധതികൾ മുഴുമിപ്പിക്കാൻ ജീവനക്കാരുടെ എണ്ണം ഇരട്ടിയാക്കി വർധിപ്പിച്ചതായും അദ്ദേഹം പറഞ്ഞു.
ഈ സാഹചര്യത്തിൽ നാട്ടിൽ അടിയന്തര ചികിത്സ ആവശ്യമുള്ള രോഗികളും ഗർഭിണികളും ഉൾപെടെയുള്ളവരെ തികച്ചും സൗജന്യമായി നാട്ടിലെത്തിക്കാൻ ഒരുങ്ങുകയാണ് അസീം ടെക്‌നോളജി.കമ്പനിയുടെ സാമൂഹിക ഉത്തരവാദിത്തത്തിൽ ഭാഗമായാണ് ഇത്തരമൊരു സംരംഭത്തിന് തയ്യാറായതെന്നും അദ്ദേഹം പറഞ്ഞു. ഇതിനായി ചാർട്ടർ ചെയ്ത ഖത്തർ എയർവേയ്‌സ് വിമാനത്തിൽ 175 യാത്രക്കാരാണുണ്ടാവുക.ആദ്യഘട്ടത്തിൽ ഗുരുതര അസുഖങ്ങളുള്ള രോഗികളെയും ഗർഭിണികളെയും മാത്രമാണ് പരിഗണിച്ചത്. ഓൺലൈൻ ലിങ്ക് വഴി അപേക്ഷകൾ ക്ഷണിച്ചാണ് ഏറ്റവും അർഹരായ രോഗികളെ തെരഞ്ഞെടുത്തത്.ജൂൺ 26 ന് വെള്ളിയാഴ്ച ഉച്ചയ്ക്ക് ശേഷം 3.30 നാണ് ഖത്തർ എയർവേയ്‌സ് വിമാനം കൊച്ചിയിലേക്ക് പുറപ്പെടുക.ഗൾഫിൽ നിന്ന് ഇതാദ്യമായാണ് തങ്ങളുടെ ജീവനക്കാരല്ലാത്ത യാത്രക്കാരുമായി ഒരു ചാർട്ടേഡ് വിമാനം കേരളത്തിലേക്ക് യാത്ര തിരിക്കുന്നത്.ഇതിന് പുറമെ ഖത്തർ കൾച്ചറൽ ഫോറം ഒരുക്കുന്ന ചാർട്ടേഡ് വിമാനത്തിൽ അമ്പതോളം യാത്രക്കാരെ സ്പോൺസർ ചെയ്യുന്നതും അസീം ടെക്‌നോളജിയാണ്.കൂടുതൽ യാത്രക്കാരെ സൗജന്യമായി നാട്ടിലെത്തിക്കാൻ കൂടുതൽ പദ്ധതികൾ ആവിഷ്കരിച്ചു വരികയാണെന്നും ഷഫീഖ് കബീർ വ്യക്തമാക്കി.
ക്ലൗഡ് ടെക്‌നോളജി മേഖലയിലെ പ്രമുഖ സംരംഭമായ അസീം ടെക്നോളജിയുടെ സ്ഥാപകനും സി.ഇ.ഒയുമായ ഷഫീഖ് കബീർ സൗത്ത് ഇന്ത്യൻ ബിസിനസ് ഐക്കൺ ക്ലൗഡ് ഗുരു പുരസ്‌കാരം ഉൾപെടെ നിരവധി അംഗീകാരങ്ങൾ നേടിയിട്ടുണ്ട്.ഗൾഫിലെ ഏറ്റവും വലിയ ക്ലൗഡ് ടെക്‌നോളജി പ്രവൈഡറായ അസീം ടെക്നൊളജിക്ക് ഖത്തർ ഉൾപ്പെടെയുള്ള ഗൾഫ് രാജ്യങ്ങളിൽ ആറായിരത്തിലധികം ഉപഭോക്താക്കളാണ് ഉള്ളത്.
