November 18, 2019
November 18, 2019
ദോഹ : ദോഹയിൽ ഒരു കുടുംബത്തിലെ കുട്ടികൾ ഉൾപെടെ മൂന്ന് പേർക്ക് ഭക്ഷ്യവിഷബാധയേറ്റതായി സംശയിക്കുന്നതായി ആരോഗ്യമന്ത്രാലയം അറിയിച്ചു. ആരോഗ്യമന്ത്രാലയം പ്രസ്താവനയിലാണ് ഇക്കാര്യം അറിയിച്ചത്. ഒരു കുടുംബത്തിലെ പിതാവും മകനും മകളും ഉൾപെട്ട മൂന്നു പേരെയാണ് ശ്വാസതടസ്സം,കാഴ്ചാ വൈകല്യം,മുഖത്തെ പേശീ വൈകല്യം എന്നീ ബുദ്ധിമുട്ടുകളുമായി ആശുപത്രിയിൽ പ്രവേശിപ്പിച്ചതെന്ന് ആരോഗ്യമന്ത്രാലയം പ്രസ്താവനയിൽ അറിയിച്ചു. മുഖത്തെ ഞരമ്പുകൾ,തൊണ്ട,ശ്വസന പ്രക്രിയ എന്നിവയെ ബാധിക്കുന്ന ബോട്ടുലിനം ബാക്ടീരിയ ശരീരത്തിൽ പ്രവേശിച്ചാലുണ്ടാകുന്നതിന് സമാനമായ രോഗലക്ഷണങ്ങളാണ് ഇവരിൽ കണ്ടെത്തിയതെന്നും ആരോഗ്യമന്ത്രാലയം വ്യക്തമാക്കി.
സാധാരണഗതിയിൽ ടിന്നിലടച്ച ഭക്ഷണത്തിലാണ് ഇത്തരം ബാക്ടീരിയകൾ കാണപ്പെടുന്നത്. ടിന്നിലടച്ച മാംസം, പ്രത്യേകിച്ച് പുകയിൽ പാകപ്പെടുത്തുന്ന മോർട്ടഡെല്ല പോലുള്ള ഭക്ഷ്യവസ്തുക്കൾ, സോസേജുകൾ എന്നിവയിൽ ഇത്തരം ബാക്ടീരിയകൾ വളരെ വേഗം പെറ്റുപെരുകുന്നതായി കണ്ടെത്തിയിട്ടുണ്ട്.രോഗികൾക്ക് ആവശ്യമായ ചികിത്സാ സൗകര്യം ഒരുക്കിയിട്ടുണ്ടെന്നും ഇതുമായി ബന്ധപ്പെട്ട മറ്റ് കേസുകളൊന്നും രജിസ്റ്റർ ചെയ്യപ്പെട്ടിട്ടില്ലെന്നും മന്ത്രാലയം അറിയിച്ചു.ആരോഗ്യമന്ത്രാലയത്തിലെ വിദഗ്ദർ ഉൾപ്പെട്ട സംഘം സംഭവത്തെ കുറിച്ച് വിശദമായ അന്വേഷണം തുടങ്ങിയിട്ടുണ്ട്.
