November 15, 2019
November 15, 2019
ദോഹ : ഏഷ്യൻ ഫുട്ബോൾ കോൺഫെഡറേഷന്റെ പുരുഷ വിഭാഗം 'ബെസ്റ്റ് പ്ലെയർ ഓഫ് ദി ഇയർ' ചുരുക്കപ്പട്ടികയിൽ ഖത്തറിന്റെ അക്രം അഫീഫ് ഇടംപിടിച്ചു. മൂന്നു പേരടങ്ങിയ അവസാനവട്ട ചുരുക്കപ്പട്ടികയിലാണ് ഖത്തറിന്റെ മുൻനിരയിൽ കളിക്കുന്ന അഫീഫ് ഇടം നേടിയത്. ഇറാൻ ഗോൾകീപ്പർ അലി റെസ ബയറൻവന്ദ്, ജപ്പാൻ ഡിഫൻഡർ തോമോയാക്കി മകിനോ എന്നിവരാണ് അവസാന വട്ട പരിഗണനയിലുള്ള മറ്റു രണ്ടുപേർ. ഡിസംബർ രണ്ടിന് ഹോങ്കോങ്ങിലാണ് പുരസ്‌കാര ജേതാവിനെ പ്രഖ്യാപിക്കുക.
ഏഷ്യൻ ഫുട്ബോളിന്റെ തിളക്കമാർന്ന പ്രതീക്ഷയാണ് അഫീഫ് എന്നും അബുദാബിയിൽ നടന്ന 2019 എ.എഫ്.സി ഏഷ്യൻ കപ്പിൽ അഫീഫ് മികച്ച പ്രകടനമാണ് കാഴ്ച വെച്ചതെന്നും എ.എഫ്.സി പ്രസ്താവനയിൽ വിലയിരുത്തി. 22 കാരനായ അഫീഫ് അൽ സദ്ദ് ക്ലബ്ബിന്റെ ഏറ്റവും മികച്ച കളിക്കാരിൽ ഒരാളാണ്. അബുദാബി എ.എഫ്.സി ചാമ്പ്യൻസ് ലീഗ് സെമി ഫൈനൽ വരെ എത്താൻ ഖത്തർ ദേശീയ ടീമിനെ സഹായിച്ചതിൽ അഫീഫ് പ്രധാന പങ്കുവഹിച്ചിരുന്നു.
വനിതകളുടെ വിഭാഗത്തിൽ ചൈനയുടെ സ്‌ട്രൈക്കർ ലി യിങ്,ഇന്ത്യയുടെ ആശാലതാ ദേവി, ജപ്പാന്റെ ക്യാപ്റ്റൻ സഖി കുമാഗി എന്നിവരാണ് അവസാന വട്ട ചുരുക്കപ്പട്ടികയിൽ ഉള്ളത്.
