March 19, 2022
March 19, 2022
ദോഹ : ഫുട്‍ബോൾ ലോകകപ്പിന്റെ സംഘാടനമടക്കം കായിക രംഗത്ത് അവിസ്മരണീയ കുതിപ്പ് നടത്തുന്ന ഖത്തർ, പുതിയൊരധ്യായം കൂടി കുറിക്കുന്നു. ലോകത്തെ ഏറ്റവും വലിയ കായിക മ്യൂസിയം മാർച്ച്‌ 31 ന് പൊതുജനങ്ങൾക്കായി തുറന്നുനൽകുമെന്ന് ഖത്തർ മ്യൂസിയം ചെയർപേഴ്സൻ ഷെയ്‌ഖ അൽ മയാസ്സ ബിൻത് ഹമദ് അൽ താനി അറിയിച്ചു. ഖത്തർ അമീർ ഷെയ്ഖ് തമിം ബിൻ ഹമദ് അൽതാനി ഉത്ഘാടനം നിർവഹിക്കും.
ഖലീഫ ഇന്റർനാഷണൽ സ്റ്റേഡിയത്തിലാണ് മ്യൂസിയം നിർമിച്ചിരിക്കുന്നത്. സ്പാനിഷ് വാസ്തുവിദഗ്ദനായ യുവാൻ സിബിന നിർമിച്ച ഈ മ്യൂസിയത്തിന് ഒട്ടേറെ സവിശേഷതകളുണ്ട്. 19000 ചതുരശ്ര മീറ്ററിൽ വ്യാപിച്ചുകിടക്കുന്ന മ്യൂസിയം, ലോകത്തെ ഏറ്റവും വലിയ കായിക മ്യൂസിയം ആണെന്ന് അധികൃതർ അറിയിച്ചു. കായിക ഇനങ്ങൾ ലോകത്ത് ആരംഭിച്ചു എന്ന് കരുതപ്പെടുന്ന ബിസി എട്ടാം നൂറ്റാണ്ട് മുതലുള്ള ചരിതം മ്യൂസിയത്തിൽ ആലേഖനം ചെയ്തിട്ടുണ്ട്. ഒളിമ്പിക്സിന്റെ പ്രത്യേക വിവരണങ്ങൾ അടങ്ങിയ ഗാലറി, അത്ലറ്റിക്സ് ഹാൾ, എന്നിവയ്‌ക്കൊപ്പം, ഖത്തർ ആതിഥ്യം വഹിച്ച ടൂർണമെന്റുകളുടെ വിവരങ്ങളും മ്യൂസിയത്തിലുണ്ട്.
