December 18, 2021
December 18, 2021
ദോഹ : കോവിഡിന്റെ പുതിയ വകഭേദമായ ഒമിക്രോൺ ഖത്തറിലും സ്ഥിരീകരിച്ചു. വിദേശത്ത് നിന്നുമെത്തിയ നാല് പേരിലാണ് ഒമിക്രോണിന്റെ സാന്നിധ്യം കണ്ടെത്തിയത്. ഇവരിൽ മൂന്ന് പേർ രണ്ട് ഡോസ് വാക്സിനും എടുത്തവരാണെന്നും, ഒരാൾ വാക്സിനേഷൻ എടുത്തിട്ടില്ലെന്നും ആരോഗ്യമന്ത്രാലയം അറിയിച്ചു.
ഒമിക്രോൺ ബാധിതരായ രോഗികൾ കൊറന്റൈൻ നടപടികൾ കൃത്യമായി പാലിച്ചിട്ടുണ്ടെന്ന് അധികൃതർ വ്യക്തമാക്കി. ഇവർക്ക് കാര്യമായ ആരോഗ്യപ്രശ്നങ്ങൾ ഇല്ലാത്തതിനാൽ ആശുപത്രിയിൽ അഡ്മിറ്റ് ചെയ്യേണ്ടിവന്നിട്ടില്ല. പരിശോധനാ ഫലം നെഗറ്റീവ് ആവുന്നത് വരെ ഇവർ കൊറന്റൈനിൽ തുടരും. ഒമിക്രോൺ വകഭേദത്തിനെതിരെ നിരന്തര ജാഗ്രത വേണമെന്ന് ഓർമിപ്പിച്ച ആരോഗ്യമന്ത്രാലയം, അർഹരായവർ എത്രയും പെട്ടെന്ന് ബൂസ്റ്റർ ഡോസ് എടുക്കണമെന്ന് അഭ്യർത്ഥിച്ചു. നിലവിൽ എഴുപതിലധികം രാജ്യങ്ങളിൽ ഒമിക്രോൺ സ്ഥിരീകരിച്ചിട്ടുണ്ട്.
