September 30, 2019
September 30, 2019
ദോഹ : ലോക കായിക ഭൂപടത്തിൽ ഖത്തർ കൂടുതൽ ഉയരങ്ങൾ കീഴടക്കാൻ ഒരുങ്ങുന്നു.2019 ലെ ലോക അത്‍ലറ്റിക്സിനും 2022 ലെ ഫിഫ ലോകകപ്പിനും പിന്നാലെ 2030-ലെ ഏഷ്യൻ ഗെയിംസും ഖത്തറിൽ എത്തിക്കാൻ അധികൃതർ നീക്കം തുടങ്ങി.ഇതിനായി ഏഷ്യന്‍ ഒളിപിംക് കൗണ്‍സിലില്‍ ഖത്തര്‍ അപേക്ഷ സമര്‍പ്പിച്ചു.
ദോഹയില്‍ നടക്കുന്ന ഏഷ്യന്‍ ഒളിംപിക് കൗണ്‍സില്‍ നിര്‍വഹണ സമിതിയുടെ 73മത് യോഗത്തിലാണ് 2030 ഏഷ്യന്‍ ഗെയിംസിന് ആതിഥ്യം വഹിക്കാനുള്ള അപേക്ഷ ഖത്തര്‍ സമര്‍പ്പിച്ചത്. ഖത്തര്‍ കായിക ചാനലായ 'ബി ഇന്‍' സ്‌പോര്‍ട്‌സാണ് വാര്‍ത്ത പുറത്തുവിട്ടത്. ദോഹയില്‍ നടക്കുന്ന ലോക അത്‌ലറ്റിക്‌സ് ചാംപ്യന്‍ഷിപ്പിന്റെ ഭാഗമായാണ് വിവിധ ഏഷ്യന്‍ ദേശീയ കമ്മിറ്റി പ്രതിനിധികളുടെ സാന്നിധ്യത്തില്‍ ഒളിംപിക് കൗണ്‍സില്‍ യോഗം ചേര്‍ന്നത്. അടുത്ത ഏഴു വര്‍ഷത്തേക്കുള്ള അജണ്ടകള്‍ യോഗം ചര്‍ച്ച ചെയ്തു. ഇതിനു മുന്‍പ് 2006 ലെ ദോഹ ഏഷ്യന്‍ ഗെയിംസിനു ഖത്തർ വേദിയായിരുന്നു. മികച്ച ആതിഥ്യവും സംഘാടന മികവും കൊണ്ട് അന്ന് ഖത്തര്‍ ലോകശ്രദ്ധ നേടുകയും ചെയ്തിരുന്നു. ഖത്തര്‍ 2030 വിഷന്റെ ഭാഗമായാണ് ഖത്തര്‍ വീണ്ടും ഏഷ്യന്‍ കായികമാമാങ്കത്തിനു വേദിയാകാന്‍ സന്നദ്ധത അറിയിച്ചിരിക്കുന്നത്.
